Әнұран отыз екі мәрте шырқалды
ITF таэквондодан оныншы Азия чемпионаты Үндістан мемлекетінің Бангалор қаласында өтті. Байрақты бәсекеде 15 елден келген 800-ден астам спортшы бақ сынасты. Қарағанды ИТФ (I.T.F.) таэквондо федерациясының спортшылары аталған чемпионаттың құрмет тұғырына 32 рет көтерілді.
Чемпионатта әртүрлі жас топтары жарияланып, жасөспірімдер, ересектер және ардагерлер үшке бөлініп өнер көрсетті.
Еліміздің намысын қорғаған таэквондошылар 32 алтын, 39 күміс және 42 қола медаль жеңіп алды. Жалпы командалық есепте ұлттық құрама Солтүстік Кореяға есе жіберіп, екінші орынды сақтап қалды. Медальдардың басым бөлігі Қарағанды облысы спортшыларының еншісінде екенін айрықша атап өткен жөн.
– Кеншілер өлкесінен чемпионатқа 17 адам барды. Олар ұзақ уақыт дайындалды. Жаз бойы жаттықты. Спортшыларымыз 11 алтын, 15 күміс және 13 қола жүлде иеленді. Бұл – керемет нәтиже. Біз әрқашан Азияда Солтүстік Корея спортшыларымен бәсекелесеміз, бірақ, олар осы спорт түрінің негізін қалаушылар. Алайда, біз оларды жеңуге тырысамыз. Қазір Қазақстан таэквондодағы Топ-5-ке кіреді. Бұл көп жылғы қажырлы еңбектің, мықты жаттықтырушылар құрамының және жақсы ынталы спортшылардың арқасында қол жеткен жетістік, – дейді жерлестеріміздің жаттықтырушысы Николай Алексюк.
Альбина мен Медина Дәуленовалар үшін бұл алғашқы жарыс болса да, алғашқы жеңіс емес.
– Мен әр барған сайын чемпионатқа бірінші рет келіп тұрғандай боламын. Бұл спорт түрін жақсы көремін. Балаларымды уайымдаймын және олардың қалай өнер көрсететініне алаңдаймын. Олардың медаль иегері болғанын білгенде, әрине, қуандым. Көз жасыма ерік бердім. Оларды спортқа үлкен қызым Нина әкелген. Қыздар таэквондоны өте жақсы көреді, оған көп уақыт бөледі. Десе де, бұл оқуға кедергі емес. Әкесі екеуміз оларға қолдау көрсетеміз, – дейді спортшылардың анасы Раушан Жүнісова.
Алда қарағандылық таэквондошылар қараша айында Ташкент шаһарында өтетін Әлем кубогында өнер көрсетпек.
Жәлел ШАЛҚАР,
«Ortalyq Qazaqstan»
