Ереже сақтау ерлікпен тең

Халықаралық балаларды қорғау күніне орай облысымыздың барлық қала және аудандарында «Қауіпсіз жаз-2024» акциясы өтті. Шара барысында түрлі спорттық және эстафеталық ойындар, концерттік бағдарламалар ұйымдастырылып, облыстық төтенше жағдайлар департаментінің өкіл-дері ата-аналар мен балаларды демалыс уақытында жолда жүру, су айдындарында, өрт жағдайла-рындағы жүріс-тұрысының нормалары мен ережелерімен таныстырды.

Акция аясында №2 оқушылар сарайында республикалық «Ән шуақ» фестивалі мен «Қауіп­сіз жаз» жобасының салтанатты ашылуы өтті. Мерекелік шара дәс­түрлі, рухани және мәдени құндылықтармен бірге адамгершілік қасиеттерді дәріптеуге бағыттал­ған. Кішкентай көрермендер үшін түрлі ойын-сауық және танымдық бағдарламалар өткізілді. Сахнада Қасым Аманжолов атындағы ба­лалар музыка мектебінің тәрбиеленушілері, Тәттімбет өнер колледжінің студенттері өнер көрсетті. Сонымен қатар, оқушылар сарайының өнерпаздары Надежда Еживскаяның «Осторожно, пожар!» ертегісі негізіндегі қойылымды көпшілік назарына ұсынды.

Облыстың төтенше жағдай де­партаментінің өкілдері балалар­ға қауіпсіздік мәдениеті жайлы сабақтар жүргізіп, алғашқы кө­мек көрсету үшін қолданылатын әдіс-тәсілдерді үйретті. Өрт жағ­дайларындағы, газ тұтыну, суға шомылу кездеріндегі қарапайым ере­желерге тоқталды.

– Қауіпсіздік мәдениеті – біздің өміріміз бен денсаулығымызды сақ­тауға, сондай-ақ, басқаларды қа­уіптен қорғауға көмектесетін ойлау мен мінез-құлық тәсілі. Жыл сайын көктемгі, жазғы маусымның басталуымен түрлі апаттық жағдайлар тіркеледі. Бұндай жағдайлардың басым көпшілігі ересектердің балаларды бақылаусыз қалдыруының салдарынан. Жыл сайын балалардың терезелерден құлауының 20-25 жағдайы орын алады. Жазатайым оқиғалардың алдын алу мақсатында департамент әр уақытта үгіт-насихат жұмыстарын жүргізеді. Дегенмен, адамдар қарапайым ережелерді біліп, оны сақтаулары аса маңызды, – деді төтенше жағдай департаменті басшысының міндетін атқарушы полковник Аманбек Алтынбекұлы.

Оңтүстік-Шығыс жергілікті полиция бөлімінің ювеналды полиция тобының учаскелік инс­пекторы, аға лейтенант Перизат Әбішева мен Нұрбибі Иманбекова кәмелет жасына толмаған балалардың құқық бұзушылықтарының алдын алу туралы баяндады.

– Күнделікті өмірде балалардың талаптарды сақтамауы салдарынан қоғамдық орындарда ұсақ бұзақылықтар тіркеліп жатады. Бұндай оқиғалар орын алса, алдымен ата-анаға немесе заңды өкілдеріне ескерту хаттамасы жіберіледі. Құқық бұзушылық тыйылмаған жағдайда айыппұл төлеу­ге міндеттеледі, – деп ескертті полиция лейтенанты.

Жазғы демалыс кезінде қоғамдық орындарда тамақтану ережелерін де білу аса маңызды. Осыған орай Қазыбек би атындағы аудандық санитарлық-эпидемиология­лық бақылау басқармасының бас ма­маны Гүлнар Әлішева балалар­ға сақтық шаралары туралы және азықтүлік таңдаудағы талаптар туралы айтты.

Мерекелік кешті түрлі өнер мектептерінің талантты бал­дыр­ғандарының ән шашуы қорытындылады.

Дильяра АБИШЕВА,

Е.Бөкетов атындағы Қарағанды зерттеу университеті
журналистика бөлімінің ІІІ курс студенті