Аймақ басшысы тұрғындармен жиі жүздеседі. Соның нәтижесінде жергілікті жерде мәселелер дереу шешімін тауып жатқанына жұртшылық куә. Облыс әкімі Ермағанбет Бөлекпаевтың тұрғындармен кезекті кездесуі Осакаров ауданында жалғасты. Халықпен бетпе-бет жүздесу кезінде ауданның өзекті мәселелері ортаға салынып, шешімін тапқандары жария етілді.
![](http://ortalyq.kz/wp-content/uploads/2024/06/IMG_4045-scaled.jpg)
Осакаров ауданында ауыз су мәселесі кезең-кезеңімен шешімін тауып келеді. Биыл алты ауылда су құбырын салу басталады. 6 мыңға жуық тұрғын сапалы ауыз сумен қамтамасыз етіледі. Осы және басқа да мәселелерді облыс әкімі Ермағанбет Бөлекпаев тұрғындарымен кездесу барысында талқылады.
– Өткен жылы Пионерское, Озерное, Ералы ауылдарында су құбыры желілері салынды, Николаевкада, Сенокосное, Садовое, Трудовоеда құбыр салу басталды. 10 елдімекенде сумен жабдықтау және кәріз жүйесіне ағымдағы жөндеу жұмыстары жүргізілді, – деді Осакаров ауданының әкімі Руслан Нұрмұханбетов. – Биыл тағы алты ауылда су құбырын салуға жобалық-сметалық құжат әзірленді. Жақын арада жұмыс Нияз ауылында басталады.
Кентішілік және аудандық жолдардың жай-күйі – Осакаров тұрғындарының жыл сайын көтеретін тағы бір маңызды мәселесі.
– «Ауыл – ел бесігі» арнайы жобасы аясында біз Батпақ және Озерное ауылдарының жолдарын жөндейміз. Онда су құбыры желілерін салу жұмыстары аяқталды. Осакаровкада кентішілік жолдарға ағымдағы жөндеу жүргізіледі. Биыл облыстық маңызы бар – «Осакаровка-Нұра» жолын салу аяқталады, – деді Ермағанбет Бөлекпаев. – Тұрғындарды сапалы ауыз сумен және жақсы жолдармен қамтамасыз ету – біртіндеп шешетін басты міндеттеріміз.
Өңір басшысы өткен кездесуде аудан тұрғындары 43 проблема көтерілгенін, олардың жартысынан көбі шешілгенін атап өтті. Олардың қатарында білім беру, мәдениет нысандарын жөндеу, Молодежныйдағы Абай атындағы мектеп жанындағы аумақты абаттандыру, Осакаровкадағы спорт алаңдары мен бағдаршам орнату бар.
Биыл Озерныйдағы мектепте күрделі жөндеу жұмыстары басталып, Ақбұлақтағы мектепті жөндеу аяқталып, қосымша құрылыс салынады. Молодежный ауылында қыркүйек айында тұрғындар көптен сұраған алғашқы музыкалық мектеп ашылады. Ол үшін бұрынғы сот ғимараты күрделі жөндеуден өтеді.
Өз тілшімізден.