Ел тұрғындарына 8 млн теңгеден жоғары кредит кепілсіз берілмеуі мүмкін
Елімізде тұтынушылық банктік қарыз және тұтынушылық микрокредит сомасына қойылатын талаптарға өзгерістер енгізіледі. Аталған қаулының жобасы «Ашық НҚА» порталында жарияланды.
![](http://ortalyq.kz/wp-content/uploads/2024/07/finance-4858797_1280-1024x676.jpg)
Қаржы нарығын реттеу және дамыту агенттігі екінші деңгейлі банктердің 2 200 АЕК мөлшеріне дейін бере алатын кепілсіз несие сомасын шектеуді ұсынып отыр. 2024 жылғы АЕК (айлық есептік көрсеткіш) көлемі – 3 692 теңге. Егер жаңа қаулы қабылданса, азаматтар кепілсіз 8 млн 122,4 мың теңгеден астам сомаға несие алу мүмкіндігінен айырылады. Ал, микроқаржы ұйымдары үшін кепілсіз кредит берудің сомасы екі есе төмен, яғни микроқарыз көлемі 4 млн 61,2 мың теңге болса кепілсіз бермеуді жоспарлап отыр.
Қоғамдық талқылау 31 шілдеге дейін жалғасады.
Сондай-ақ Қаржы нарығын реттеу және дамыту агенттігі әзірлеген құжатта жобаның әлеуметтік маңызы жоқ екендігі айтылған. Мақсат – несие беру тәжірибесін банктер мен микроқаржы қызметі туралы қолданыстағы заңдардың нормаларына сәйкес келтіру.
Айта кетейік, жаңа нормалардың кепілдендірілген несиелерге қатысы жоқ.
Материалды әзірлеген Аида РАХЫМҚҰЛОВА