Абай ауданындағы қазақша сөйлейтін өзге ұлт өкілдері байқауда жеңіске жетті
Абай ауданында “Мен қазақша сөйлеймін” байқауының қорытындысы шығарылды. Додада 16 үміткер бақ сынасты. Бірінші орынды П. Корниенко атындағы мектептің 22 жастағы инженері Кирилл Галыш жеңіп алды.
Кирилл – Ақмола облысы Егіндікөл ауылының тумасы. Қазақ тілді ортада өскен және бала кезінен аулада мемлекеттік тілде сөйлесуге тырысқан. Ауызекі сөйлесуді және оны дұрыс қолдануды әскер қатарында жүргенде жетілдірген.
– Мен мектепте төртінші жыл жұмыс істеймін. Осы жерден әскерге кеткен едім. Талдықорғанда Ұлттық ұланның автомобиль взводында қызмет еттім. Әскердегі қызметтестерімнің басым бөлігі – қазақтар болды. Біз әскерге шақырылған кезде олар маған қазақ тілін, ал мен оларға орыс тілін үйретеміз деп бірден келісіп алдық, – деді Кирилл.
Кириллге “Мен қазақша сөйлеймін” байқауына қатысуды әріптестері ұсынған. Олар жігіттің қабілетін байқап, мемлекеттік тілді жақсы меңгергеніне баға берді.
– Мен өзім туралы айтып, Абай Құнанбаев аударған “Тау шыңдары” шығармасынан шағын үзінді оқыған бейнеролик жаздым. Менің есте сақтау қабілетім жақсы – шығарманы бірнеше минут ішінде жаттап алдым. Қазір маған айтылған сөздердің 80 % түсінемін және сұрақтарға еркін жауап бере аламын. Менің білімім өмірімде көмектеседі, – дейді Кирилл.
Екінші орынды Мичурин атындағы орта мектептің музыка мұғалімі Елизавета Тимереева иеленді.
Үшінші орын Нүркен Әбдіров атындағы тірек мектебінің бастауыш сынып мұғалімі Маргарита Калиниченко болды.
– Біздің байқау түрлі этнос өкілдері арасында қазақ тілін насихаттауға бағытталған. Оған 16 адам қатысты. Олар қазақ ақындарының шығармалары ұсынылған және оқылған бейнелер жазды. Бұл бейнероликтер әлеуметтік желілерде #АбайМенқазақшасөйлеймін2022 хештегімен жарияланды, – деді Абай ауданының ішкі саясат, мәдениет және тілдерді дамыту бөлімінің бас маманы Жазира Тұрсынбаева.
Байқау жеңімпаздары дипломмен және бағалы сыйлықтармен марапатталды.
