Қарағандылық оқушылар үздіктер қатарында
Алматыда өткен ХХ Халықаралық О.Жәутіков олимпиадасынан қарағандылық үш оқушы үшінші орын әкелді. Әлемнің 16 елінен 700-ге жуық оқушы бақ сынасқан білім додасында жеңімпаз атанды.
№1 Білім-инновация лицейінің 10 сынып оқушылары Әліби Ақберді мен Жанарыс Теңдіков және Н.Нұрмақов атындағы мамандандырылған мектеп-лицей интернатының 10 сынып оқушысы Әлішер Қазтаев үшінші орын алып, облыс намысын қорғады.
– Жанарыс Теңдіков 7 сыныптан бастап, математикалық сайыстарға қатысып келеді. Өткен жылы ол республикалық олимпиадада бірінші орынды иеленді. Биылғы жылы геометрия бойынша халықаралық олимпиадада 10th Iranian Geometry Olympiad үшінші орын алды. Жанарыс Қазақстан құрамасының резервінде, – деді №1 Білім-инновация лицейінің математика пәнінің мұғалімі Серікжан Қалданов.
О.Жәутіков халықаралық олимпиадасы 2005 жылдан тұрақты өтіп келеді. Халықаралық қазылар алқасы жеті елдің – Қазақстан, Ресей, Армения, Беларусь, Оңтүстік Корея, Қытай және АҚШ өкілдерінен тұрды.
Ербол ЕРБОЛАТ,
Ortalyq.kz
