Қарағанды облысының Мағзұмовтар әулеті «Еңбек жолы» республикалық байқауында

Қарағанды облысында «Еңбек жолы» байқауының өңірлік кезеңінің жеңімпаздары анықталды. Іріктеу турлары барлық қалалар мен аудандарда өтті. Облыстық комиссияға биыл еңбек әулеттері арасындағы үздік атаққа үміткерлерден, жас жұмысшылар мен олардың тәлімгерлерінен 54 өтінім келіп түсті.

«Үздік еңбек әулеті» номинациясы бойынша Бұқар Жырау ауданының Мағзұмовтар отбасы лауреат атанды. Әулет отағасы, Ұлы Отан соғысының қатысушысы Қайролла Мағзұмов көп жылдар бойы Сарытау мектебінің директоры болып жұмыс істеді. Балаларға математика пәнінен сабақ берді. «Халық ағарту ісінің үздігі» белгісінің иегері.

Ауылдастар мұғалімнің азаматтық ерлігін еске алады. Күрделі 90-жылдары дағдарыс кезінде ол мектепті құлдыраудан құтқарды – ол өз ақшасына көмір сатып алды. Сосын коммуникацияларды жөндеуге және абаттандыруға өз жалақысын берген. Жағдай жақсарған соң тоғыз жылдық мектеп толыққанды орта мектеп болуына қол жеткізген.

Жұбайы Шайда Жапарова 40 жылдан астам бастауыш сынып мұғалімі болып жұмыс істеген.

Ата-аналарының ізімен балалар мамандық таңдады. Білім беру саласында олардың бір ұлы, екі қызы және күйеубалалары жұмыс істейді. Педагогикалық әулеттің жалпы еңбек өтілі – 276 жыл. Оның әрбір мүшесі жас ұрпақты оқыту мен тәрбиелеуге үлес қосады.

«Өндірістің үздік жас маманы» номинациясында Теміртаудан келген металлург Сергей Емелин жеңімпаз болып танылды. Үш жыл бұрын ол «АрселорМиттал Теміртау» АҚ комбинатына жұмысқа келді. Оттегі цехының ауа бөлу учаскесінің шебері болып жұмыс істейді. Оның міндетіне технологиялық процестің сақталуын бақылау кіреді.

Сергей еңбек әулетін жалғастыруда. Зауыт зертханасында оның әжесі көп жылдар бойы жұмыс істеген. Әкесі табақ илеу цехында жұмыс істейді.

«Жұмыс істейтін жастардың үздік тәлімгері» номинациясында «Қазақмыс» корпорациясы» ЖШС – «Жезқазғантүстімет» ӨБ филиалы Қарсақпай металлургия зауыты өндірістік – техникалық бөлімінің бастығы Құланқадыр Еділбаев бірінші орынды иеленді. Еңбек жолын токарь оқушысынан бастаған. Әскерден кейін Қарағанды политехникалық институтын бітіріп, инженер-механик мамандығы бойынша жоғары білім алды. Қарсақпай металлургиялық комбинатында 40 жылдан астам уақыт жұмыс істейді, осы жылдар ішінде бірнеше жас жұмысшыларды тәрбиелеп шығарды. Біріншісі тек еңбекте ғана емес, спортта да: волейбол жарыстарында көптеген марапаттарға ие болды.

Өңірлік кезеңнің жеңімпаздары облысты республикалық деңгейде көрсететін болады.

Еңбек әулеттері мен өндіріс қызметкерлері арасындағы «Еңбек жолы» байқауы 2016 жылдан бастап Тұңғыш Президент Нұрсұлтан Назарбаевтың Жалпыға Ортақ Еңбек Қоғамын құру жөніндегі идеясын іске асыру үшін өткізіледі.