Қарағанды облысында тұтынушылар белсенділігі 23%-ға артты
Қарағанды облысында тұтынушылардың өз құқықтарын қорғау мәселелеріндегі белсенділігі айтарлықтай артқаны байқалады. 2026 жылдың бірінші тоқсанының қорытындысы бойынша уәкілетті органдарға 822 өтініш түскен — бұл өткен жылдың сәйкес кезеңімен салыстырғанда 23%-ға көп (632 өтініш).
Бұл өсімде цифрлық сервистер маңызды рөл атқарды. «Е-өтініш» жүйесі арқылы 540 өтініш жолданған — бұл өткен жылмен салыстырғанда шамамен бір жарым есе көп. Сонымен қатар, жеке қабылдаулар саны да артты: мамандарға 107 адам жүгінген. Мұндай динамика тек құқықтарды қорғау құралдарының қолжетімділігінің кеңейгенін ғана емес, сонымен бірге халықтың құқықтық сауаттылығының артқанын көрсетеді.
Сонымен бірге, өтініштер санының өсуі объективті мәселелермен де байланысты — атап айтқанда, сапасыз қызмет көрсету жағдайларының жиілеуімен. Ең үлкен өсім тұрмыстық қызмет көрсету саласында тіркелді — 192 өтініш (2,8 есе өсу). Бөлшек саудада 191 өтініш (+44,7%), білім беру саласында — 68 (13 еседен астам өсім), тұрғын үй-коммуналдық шаруашылықта — 55 (+96,4%), ал байланыс қызметтерінде — 22 (+69,2%) тіркелген.
Сонымен қатар, электрондық сауда саласында шағымдардың азаюы байқалады — 234 өтініш (-33,9%), сондай-ақ туристік қызметтер саласында — небәрі 3 өтініш (-72,7%).
Жұмыс тиімділігінің негізгі көрсеткіштерінің бірі — тұтынушыларға қайтарылған қаражат көлемінің айтарлықтай артуы болды. Есепті кезеңде бұл сома 28,9 млн теңгені құрады, бұл өткен жылдың көрсеткішінен 126,8%-ға жоғары. Бұл қабылданған шаралардың нәтижелілігін және азаматтардың бұзылған құқықтарын қалпына келтіру бойынша жүйелі жұмысты растайды. Атап айтқанда, бірінші тоқсанда бір резонансты іс қаралды: сотқа дейінгі тәртіпте тұтынушы жиһаз дүкенімен болған дауда 5,5 млн теңгені қайтарып алды.
Мемлекеттік бақылау мен құқық бұзушылықтардың алдын алуға ерекше назар аударылуда. Тексеру қорытындылары бойынша 5 кәсіпкерлік субъектісі әкімшілік жауапкершілікке тартылып, жалпы сомасы 64 875 теңге айыппұл салынды. Сонымен қатар, бір ескерту мен бір бұзушылықтарды жою туралы нұсқама берілді.
Ақпараттық-түсіндіру жұмыстары облыстық БАҚ аясында бірқатар сюжеттер шығарылып, «Таир» сауда үйінде ашық есік күні өткізілді. Іс-шараға 300-ден астам адам қатысты: тұтынушылар кеңес алды, ал кәсіпкерлерге заңнаманы сақтау бойынша ұсынымдар берілді.
Алдағы уақытта департамент қызметі профилактикалық жұмысты күшейтуге, ақпараттық-түсіндіру бастамаларын кеңейтуге және ведомствоаралық өзара іс-қимылды дамытуға бағытталатын болады.
Тұтынушылардың құқықтары бұзылған жағдайда, азаматтар өз құқықтарын қорғау және кеңес алу үшін Қарағанды қаласы, Гоголь көшесі, 34, 4-қабат мекенжайында орналасқан Департаментке жүгіне алады. Сонымен қатар, 8 (7212) 21-42-08 сенім телефоны жұмыс істейді.
Бұдан бөлек, өтінішті онлайн форматта eGov.kz порталы арқылы «Е-Өтініш» сервисін пайдаланып жолдауға болады. Бұл азаматтарға өтінішті жеке келмей-ақ жедел түрде жолдауға мүмкіндік береді.
ortalyq.kz
