Кеншілер күніне арналған ауқымды концертке 250 мыңға жуық көрермен жиналды
Кеншілер күнінде Қарағанды Қазақстандағы ең ірі музыкалық шаралар өтетін орталыққа айналды. Qarmet компаниясы ұйымдастырған Кеншілер күніне арналған мерекелік концертке шамамен 250 мың көрермен жиналып, қалалық мерекелік іс-шаралар ауқымы бойынша жаңа рекорд орнатылды.
Жаңа концерт алаңы Қарағанды өңірінің тұрғындарын, Қазақстанның өзге облыстарынан келген қонақтарды және шетелдік туристерді біріктірді.
Жүздеген мың адам тәуелсіз Қазақстан тарихындағы ең ауқымды Шахтер күні мерекесінің бір бөлігі болу үшін Қарағандыға арнайы келді.
Бір сахнада Dequine, Moldanazar, Қайрат Нұртас, Дима Билан және Димаш Құдайберген өнер көрсетті. Түрлі жанр мен буын өкілдерін біріктірген концерттік бағдарлама бірнеше сағат бойы көрермендердің назарын өзіне аударды.
Заманауи сахна, қуатты дыбыс, жарық және мультимедия, әлемдік және ұлттық деңгейдегі өнерпаздардың өнер көрсетуі, сондай-ақ рекордтық көрермен саны ерекше атмосфера қалыптастырды. Ұйымдастырушылардың айтуынша, концерт бұған дейінгі барлық көрсеткіштерді жаңартты.
«Бұл алаңның энергиясы керемет. Қарағандыға және барлық көрермендерге осындай ауқымды әрі жылы қабылдау үшін рақмет. Шахтер күні құтты болсын!» – деді Дима Билан.
Кештегі көп күткен сәттердің бірі – әлемге танымал қазақстандық әнші Димаш Құдайбергеннің сахнаға шығуы.
«Көп рақмет, құрметті ағайын! Бұл – керемет сәтте сіздермен бірге болу зор бақыт! Кеншілер күні құтты болсын!» – деді Димаш Құдайберген.
Мерекелік іс-шаралар кәсіпорын қызметкерлерін, сала ардагерлерін,
олардың отбасыларын, өңір тұрғындары мен қала қонақтарын біріктірді.
Мерекенің шарықтау шегі – Қазақстанның шахтерлер астанасының аспанын жарқырата түскен ауқымды отшашу.
Жарқын шоу ширек миллионға жуық адамды біріктірген тарихи кештің әсерлі нүктесіне айналды.
Қарағандыда Шахтер күні алғаш рет рекордтық көрсеткішке негізделіп, ауқымды аталып өтті.
Аяулым СОВЕТ
Ortalyq.kz
