Көңілден шыққан фестиваль

Сәтбаев қаласы әкімдігінің қолдауымен Шынболат Ділдебаев атындағы Кеншілер сарайының ұжымы «Ұлы Дала» тарихи-этносаябағында алғашқы қалалық «Ханшайым» фестивалін ұйымдастырып, көпшіліктің көңілінен шыққан көңілді кеш сыйлады. Әсерлі іс-шараны өткізуге қалалық мәслихат депутаты, жеке кәсіпкер, қалалық меценаттар клубының мүшесі Шолпан Жаңғасқынова демеушілік жасады.

Былтыр есігін айқара ашқан «Ұлы дала» тарихи-этносаябағы әртүрлі байқау, көрме, игілікті іс-шара өтетін, жастар жиі бас қосатын, тұрғындар уақытын тиімді өткізетін маңызды мәдени орталыққа айналды. Бүгін «Балалар жылы» аясында ерекше фестивальдің тұсауы кесілгелі отыр. Байқауға баласын қатыстырып, барынша қолдау көрсетіп келген барша ата-анаға айырықша алғысымды білдіремін! – деді, кішкентай ханшайымдарды құттықтап, сәттілік тілеуге арнайы келген қала басшысы Асқар Ыдырысов.

Жиналған жұртшылықты ынтықтырған өнер байқауында Әлкей Марғұлан атындағы орта мектептің даярлық тобынан Нұрайлым Қасым, Абай атындағы мектеп-лицейдің даярлық тобынан Ақниет Мейрамбек, Жәния Даниярқызы, Ару Орынбай, Шұғыла Алтынбек, Ыбырай Алтынсарин атындағы мектеп-лицейдің даярлық тобынан Қымбат Қайырғали, Көркем Мәдімхан, Жасмин Мәдімхан, Саида Мұрат, Аида Жандарбек, №27 орта мектептің даярлық тобынан Асылжан Мұхамбедия, Бинұр Ахмедия, Медина Насреддин, Бауыржан Момышұлы атындағы мектеп-гимназияның даярлық тобынан Кәусар Өмірбек, Айғаным Жүкенова, №16 орта мектептің даярлық тобынан Сая Абулмажитова, Нұрай Қамария, «Ақбота» балабақшасынан Гүлім Бағдат, Нұрдана Төлеубай, Айбарша Бейбіт, «Алпамыс» балабақшасынан Мұрат Көзайым, Жанерке Балтабек, «Айналайын» балабақшасынан Айханым Қалибек, Аяла Қыдырбек, «Нұрбөбек» балабақшасынан Аруна Оразалина, Аруназ Жарылқапберген, №31 балабақшадан Іңкәр Өмірбек, ата-әжесінің тәрбиесіндегі Кәмшат Қайырғали бақ сынады. 3-7 жас аралығындағы олар бірінші кезеңде қазақтың ұлттық киімдерін көпшілік назарына ұсынып, екінші кезеңде өнер көрсетті: ән салып, би биледі, мәнерлеп тақпақ оқыды.

Фестивальге қатысушылар келесі кезеңге дайындалған кезде бірнеше байқаудың жеңімпазы «Дамира» би тобы, күні кеше ғана Алматыда өткен «Қазақстан таланттары» атты би байқауында топ жарған «Жасмин» би тобы, қала балабақшалары арасында өткен «Әнші балапан» байқауының жүлдегері Әсия Болат, республикалық және халықаралық байқаулар жеңімпазы Анита Гатиятова өз өнерін ортаға салды.

Әлібек ӘБДІРАШ.

СӘТБАЕВ қаласы.