21 тамыз – Спорт күні: Қарағандыда қандай шаралар өтеді?

21 тамыз, жексенбі күні қарағандылықтарды үлкен спорттық мереке күтеді. Бұл күні бүкіл Қазақстан Спорт күнін атап өтеді.

Спорттық іс-шаралар бір уақытта бірнеше қалалық алаңдарда ұйымдастырылады.

Байқаудың басым бөлігі Орталық мәдениет және демалыс саябағында өтеді.

Сағат 10:00-де 10–11 жас аралығындағы жасөспірімдер арасында футболдан финалдық ойындар, роликті коньки бойынша финалдық жарыстар, 18–40 жас, 40 жас және одан жоғары жас санатындағы ерлер мен әйелдердің аралас командалары арасында волейболдан финалдық турнирлер өтеді.

Сағат 10:00-де ұлдар мен қыздарға арналған жеңіл атлетика жарысы басталады. Жас топтары: 10–12, 13–14, 15–16 жас. Қатысуға өтінімді 21 тамызда сағат 09:00-ден 09:30-ға дейін саябақтағы стационарлық сахнада беруге болады.

Сағат 12:00-де қаланың спорт мектептері оқушыларының көрсетілімдері басталады.

Балалар мен жасөспірімдер сарайының спорт алаңында сағат 10:00-де стритболдан финалдық турнирлер өтеді.

Қаланың Оңтүстік-Шығыс бөлігінде, “Тутұғыр” композициясының жанында, сағат 10:00-де шаңғы роллерінен жарыс басталады.