4 қазан – Қазақстан Қарулы Күштері Зымыран әскерлері мен артиллерия күні
4 қазан – Артиллерия әскерінің кәсіби күні. Бұл күні қарулы күштердің маңызды буындарының бірі саналатын артиллерия саласында қызмет етіп жүрген әскери қызметшілерге құрмет көрсетіледі.
«Артиллерия – соғыс тәңірі» деген қанатты сөз Ұлы Отан соғысы жылдарынан бері әскери тарихта кеңінен қолданылып келеді. Бұл атау артиллерияның ұрыс алаңындағы шешуші рөлін айқындайды.
Артиллерия әскерінің басты ерекшелігі – қарсыластың қорғаныс шебін алыстан дәл соққымен жою мүмкіндігі. Соғыс жылдарында артиллериялық бөлімдер жаудың бекіністерін талқандауға, техникасы мен әскери күшін әлсіретуге және жаяу әскердің алға жылжуына жол ашуға маңызды үлес қосты.
«Соғыс тәңірі» деген атаудың қалыптасуына артиллерияның қуатты қару түрі ретіндегі мүмкіндігі себеп болды. Оның негізгі артықшылықтарының бірі – үлкен қашықтықтан соққы беру қабілеті. Осы арқылы артиллерия ұрыс барысына тікелей әсер ететін негізгі күштердің біріне айналды.
Артиллерияның әскери тарихтағы орны Кеңес Одағы кезеңіндегі ірі шайқастармен тығыз байланысты. Сол жылдары артиллериялық бөлімдердің жауынгерлік тәжірибесі қалыптасып, кәсіби дәстүрлері кейінгі ұрпаққа жалғасты.
Бүгінде артиллерия әскерінің міндеттері заманауи технологиялармен толықты. Қару-жарақ жүйелері жетілдіріліп, нысананы анықтау, атысты басқару және дәлдікке бағытталған жаңа технологиялар енгізілуде. Соған қарамастан оның негізгі міндеті – әскердің жауынгерлік мүмкіндігін арттыру және ұрыс жағдайында қажетті атыс қолдауын қамтамасыз ету.
4 қазан – осы жауапты қызметті атқарып жүрген артиллеристердің кәсібилігі мен жауынгерлік даярлығын атап өтетін күн. Бұл – әскери тарихта өзіндік орны бар артиллерия әскерінің дәстүрін дәріптеп, Отан қорғау жолындағы қызметті құрметтеу мүмкіндігі.
Диас СЕРІКҚАЗЫҰЛЫ
Ortalyq.kz
