Мектептерде бақылау күшейді

Елдегі мектептердің 99%-ы бейнебақылау жүйелерімен жабдықталған. 2018 жылы бұл көрсеткіш тек 75% -ды құраған болатын. Бұл жайлы Білім және ғылым министрлігінің баспасөз қызметі мәлімдеді.

БҒМ Білім және ғылым саласындағы сапаны қамтамасыз ету комитетінің аумақтық департаменттері мектептер мен балабақшалардың бейнебақылау жүйелерімен және жылы дәретханалармен қамтамасыз етілуі бойынша мониторинг жүргізді. Жалпы, жылы дәретханаларды орнату мәселесінің шешілуінде оң динамика байқалатынын атап өткен дұрыс.

– Мектепке дейінгі және орта білім беру ұйымдарын жылы дәретханалармен және бейнебақылау камераларымен қамту төңірегінде ауқымды жұмыстар жүргізілді. Бұл балалардың денсаулығы мен қауіпсіздігіне байланысты мәселе болғандықтан, мұндай маңызды сұрақты «ұсақ мәселе» деп қарастыруға болмайды. Өткен жылы еліміз бойынша 2700 мектепте жылы дәретхана болмаса, бүгінгі таңда 2456 мектепке жылы дәретхана салынды. Бұл ретте сапа мәселесін де назардан тыс қалдырмағанымыз абзал. Мектептерде дәретханаларды іске қосып, бірақ оларды жауып қойып, оқушылар даладағы дәретханаларға барып жүретін жағдайға жол бермеуіміз керек. Облыстық білім басқармаларының басшылары бұл мәселені қатаң бақылауға алулары тиіс, – деді министр. «Білім беру ұйымдарын бейнебақылау камераларымен қамту мәселесі де маңызды. Бүгінгі таңда камералармен қамту көрсеткіші 99%-ға жетіп отыр. Дегенмен атқарылған жұмыстың саны емес, сапасы маңыздырақ. Білім және ғылым министрлігі мен Ішкі істер министрлігінің бұйрықтарына сәйкес білім беру ұйымдарын бейнекамералармен қамту бойынша нақты талаптар қойылған. Орнатылған бейнебақылау камералары барлық талаптарға сай болуы тиіс», – деді Асхат Аймағамбетов министрліктің аппарат жиналысында.

Қасымхан ҒАЛЫМ.