Президент олимпиадасының үздіктері анықталды
Жаратылыстану-математика циклі пәндері бойынша XVI Президенттік олимпиаданың республикалық кезеңі аяқталды. Қазақстанның барлық өңірлерінен келген 198 оқушы өзара үздікті анықтады. Зияткерлік жарыстар Қазақстан Республикасы Оқу-ағарту министрлігі «Дарын» республикалық ғылыми–практикалық орталығының жоспарына сәйкес «Сарыарқа Дарыны» орталығының ұйымдастыруымен ағымдағы жылдың 21-24 қараша аралығында академик Е.Бөкетов атындағы Қарағанды университетінің базасында өтті.
Олимпиада қорытындысы бойынша 10 жеңімпаз ҚР Оқу-ағарту министрлігінің I дәрежелі дипломдары және алтын медальдарымен, 15 жүлдегер II дәрежелі дипломдары мен күміс медальдарымен және 27 қатысушы III дәрежелі дипломдары және қола медальдарымен марапатталды.
20 жеңімпазға оқуға білім беру гранттары табысталды:
Х.Досмұхамедов атындағы Атырау университеті – 10, «Тұран» университеті – 3, Alikhan Bokeikhan University – 5, Өзбекәлі Жәнібеков атындағы Оңтүстік Қазақстан педагогикалық университеті – 2.
Сонымен қатар, академик Е.Бөкетов атындағы Қарағанды университеті олимпиаданың жеңімпаздары мен жүлдегерлері аталған оқу орнына түскен жағдайда арнайы шәкіртақы тағайындайтынын хабарлады.
Ербол ЕРБОЛАТ,
ortalyq.kz