«Немқұрайлы қарамайық»

Осакаров ауданында 21561 сайлаушы бар. Сағат 14.00-де 13987-сі таңдауын жасады.

– Ауданда 41 учаскелік комиссия жұмыс істеуде. Сайлаушылар белсенділігі жоғары. 110 жас жерлесіміз алғаш рет дауыс берді. Сондай-ақ, 409 азаматтан үйде дауыс беру бойынша өтініш түсті, – дейді Осакаров аудандық сайлау комиссиясының төрағасы Дана Молдағалиева.

Алғаш рет дауыс берген 110 жастың қатарында Аяулым Сүлейменова бар. Ол аудан орталығындағы №651 учаскеде тіркелген.

– Кәмелет жасқа толып, дауыс беру құқығына ие болғаныма қуаныштымын. Алып еліміздің мен де бір маңызды бөлшегіне айналғанымды бүгін айқын сезіндім. Мен елімнің келешегіне сенемін. Қазақстанды гүлдендіру, қоғамдық сананы өзгерту – біздің қолымызда. Жайбарақат жүріп, немкетті қарамайық, – дейді бойжеткен.

Сондай-ақ, түске дейін Есіл ауылындағы мектеп-интернат-колледж студенттері де дауыс берді. Олардың басым көпшілігі алғаш рет сайлауға қатысты.

Нұрқанат ҚАНАПИЯ,

Осакаров ауданы

Оrtalyq.kz