Абай облысы мәдениет, архивтер және құжаттама басқармасының ұйымдастыруымен әнші-композитор Тұрсынғазы Рахимов атындағы республикалық «Сәби болғым келеді» ән байқауы өтті. Байқауға еліміздің түпкір-түпкірінен әр аймақтың үздік деген 26 әншісі қатысып, бақ сынасты.
Аталған ән додасына Қарағанды облысының атынан қатысқан балқаштық әнші Нұрболат Ұзақбайдың асығы алшысынан түсті. Бағы мен бабы қатар шауып, орындаған әндері елдің көңілінен шығып, ыстық ықыласына бөленді. Қазылар алқасының жоғары ұпайына ие болды.
Ол бірінші кезеңде Т.Рахимовтың «Бибігүл», «Ақбөкен» және Әсет Найманбайұлының «Кіші Ардақ» әнін нақышына келтіре орындап, ақтық сынға сүрінбей жеткен 10 қатысушының қатарынан табылды.
Ақтық сында Т.Рахимовтың «Қазағым-ай», «Алпыстың асуын-ай» және Біржан салдың «Жанбота» әнін әуелетіп, бірінші орынды иеленіп, бір миллион теңге қаржылай сыйлықты жеңіп алды.
Нұрболат Ұзақбай – Тәттімбет өнер колледжінің және Құрманғазы атындағы Қазақ ұлттық консерваториясын үздік бітірген күміс көмей әнші. Бүгінде халық әндерін заманауи түрде насихаттап жүрген «Қазақша терапия» №1 музыкалық театрландырылған жобасының белді мүшесі. Есімі Арқа жұртына етене таныс Нұрболат Қазақстанның еңбек сіңірген қайраткері Дәуренбек Әркеновтің шәкірті.
Сонымен қатар, Нұрболат өнерлі отбасыдан шыққан. Әкесі – Таңат Іргебаев Балқаштың мәдени-сауық орталығындағы «Сарыарқа» халықтық-фольклорлық ансамблінің жетекшісі. Ал, анасы Жансая Абдуалиева – Балалар өнер мектебі директорының орынбасары және дәстүрлі ән сыныбының ұстазы.
Облыс намысын лайықты қорғаған талантты әнші Нұрболаттың болашақта әлі талай биікті бағындырарына бек сенеміз!
Өз тілшімізден.
