Қарағанды облысында баламалы энергетиканың тағы бір ірі нысаны бой көтереді. Облыс әкімі Ермағанбет Бөлекпаев қытайлық China Energy компаниясының басшысы Сяодан Линь мырзаны арнайы қабылдап, Осакаров ауданында 500 МВт 65 жел генераторын салу туралы меморандумға қол қойды.
Бұл – Осакаров ауданы аумағында шетелдік инвестицияларды тарту арқылы жүзеге асырылып жатқан екінші жоба. Бой көтеретін жаңа жел паркі Сарыөзек ауылында салынады.
– Мұндай станцияларды салу – Мемлекет басшысы Қасым- Жомарт Тоқаевтың Қазақстанның көміртегі бейтараптығына қол жеткізу жөніндегі маңызды стратегиялық бастамаларының бірі. Аймағымыз үшін де үлкен маңызға ие, – деп атап өтті Ермағанбет Бөлекпаев.
Жел қондырғыларының ірі өндірушісі China Energy Overseas Investment Co. Ltd. компаниясы мұндай шешімге келмес бұрын аумаққа алдын ала талдау жасаған. Компания басшысы Сяодан Линь мамандар желдің жылдамдығын өлшеп, жобаның техникалық-экономикалық негіздемесін дайындайтынын айтады.
– Бұған дейінгі кездесуімізден кейін бірқатар жұмыс атқарылды. Жобаны жүзеге асыруға дайындық та белгілі бір нәтижеге қол жеткізілді. Талдау нәтижелеріне сүйенсек, жел ресурстары жобаның талаптарын қанағаттандырады. Біз оның болашағы оң болатынына сенімдіміз, – дейді Сяодан Линь.
Осакаров ауданында жел қондырғыларын салатын алаңның кездейсоқ таңдалмағанын да атап айту керек.
Қажетті алаң жыл бойы жел соғатын аймақта орналасқан. Әсіресе, Осакаровка – Сарыөзек – Тельман учаскесі.
Ауданда 150 МВт-тық екінші бір инвестициялық компанияның жел қондырғылары бар екенін де айта кеткен жөн. Қазіргі таңда оның алтауы тұрғызылған, жетіншісі аяқталуға жақын. Барлығы 21 қондырғы орнатылады. Сонымен қатар, мұнда 20 адам жұмыспен қамтылады.
– Біз қазір ауданға инвесторларды тарту бағытында белсенді жұмыс істеп жатырмыз. Сонымен бірге, 500 МВт жел станцияларын орнату үшін үшінші жоба бойынша да келіссөздер жүргізудеміз. Үш жобаны жүзеге асыру – ауданның жасыл энергетика саласындағы ұстанымын нығайтумен қатар, қосымша салық түсімдері мен жаңа жұмыс орындарын ашады, – деп атап өтті Осакаров ауданының әкімі Руслан Нұрмұханбетов.
Өз тілшімізден
Суреттерді түсірген Жангелді ӘБДІҒАЛЫМ
