Биыл 8 мыңнан аса оқушы облыс колледждеріне грантқа түсе алады
Биыл Қарағанды облысының колледждеріне грантқа 8 мыңнан астам оқушы үміттене алады.
Қарағанды облысы білім басқармасының техникалық және кәсіптік білім беру бөлімінің басшысы Индира Ысқақова колледждерді мемлекеттік тапсырыспен қамтамасыз ету және өңірлік коммуникациялар қызметі платформасында өткен брифингте тәжірибелік оқытуды енгізу туралы баяндады.
– Соңғы үш жылда бізде колледжге түскісі келетін білім алушылар саны артты. 2025 жылға қарай тегін техникалық және кәсіптік біліммен қамтамасыз етуді 100 пайызға дейін жеткізуді жоспарлап отырмыз, – деп атап өтті Индира Ысқақова. – Сондай-ақ, осы оқу жылынан бастап өңірде Қарағанды кәсіптік-техникалық және Теміртау техникалық колледжінің базасында “шаштараз өнері” және “дәнекерлеу ісі” мамандықтары бойынша 10–11 сынып оқушыларын Тәжірибелік оқыту енгізілді. Яғни, 10–11 сынып оқушылары таңертең мектепте оқиды, ал түстен кейін (3–4 сағат) осы колледждердің базасында оқиды. Мектепті бітіргеннен кейін олар орта білім туралы аттестат пен біліктілік туралы диплом алады.
Облыста техникалық және кәсіптік білім беру жүйесінде барлығы 55 колледж жұмыс істейді. Мамандарды даярлау 97 мамандық және 114 біліктілік бойынша жүзеге асырылады. Колледждерде 31 912 студент оқиды, оның 21 516-сы мемлекеттік тапсырыс бойынша білім алады. Кадрларды сапалы даярлау үшін 42 колледжде 6425 адамды қамтитын дуальды оқыту енгізілді. “Жас маман” жобасы аясында 14 оқу орны АҚШ, Италия, Германия, Швеция, Франция, Австрия өндіретін әлемдік брендтердің заманауи жабдықтармен жабдықталған.
Биылғы жылы колледждерде мемлекеттік тапсырыс бойынша күндізгі оқу нысанына өтініштер күнтізбелік жылдың 25 маусымынан 18 тамызына дейін негізгі орта білім беру базасында, ақылы негізде – 25 маусымнан 25 тамызға дейін, кешкі және сырттай оқу нысандарына – 25 маусымнан 20 қыркүйекке дейін, 25 маусымнан 20 шілдеге дейін шығармашылық дайындықты талап ететін мамандықтар бойынша, педагогикалық, медициналық мамандықтар бойынша-25 маусымнан 15 тамызға дейін қабылданады.
Аида РАХЫМҚҰЛОВА,
ortalyq.kz
