Бөкетов университетінде туберкулезге қарсы жоба жүзеге асырылуда
Е.Бөкетов университетінің ғалымдары туберкулезге қарсы дәрілік заттарды жеткізудің коллоидтық жүйелерін әзірлеуге арналған жобаны жүзеге асыруда.
Е.Бөкетов атындағы Қарағанды университетінің ғылыми қызметкері Альдана Ғалиқызының айтуынша, ингаляциялық дәрілік форманы қолдану туберкулезге қарсы препараттарды өкпеге тікелей жеткізуге мүмкіндік береді. Дәрінің уыттылығын төмендетеді.
– Қарағанды медицина университетінде M.Tuberculosis дақылдарында туберкулезге қарсы дәрілерге сезімтал және төзімді нанобөлшектердің микробқа қарсы белсенділігі зерттеледі. Жұмыс тобы мүшелерінің жоспарлы іс-сапарлары аясында кейбір зерттеулер Рединг университетінде және Чехия ғылым академиясының макромолекулалық химия институтында жүргізілетін болады. Зерттеу нәтижесі полимерлер химиясының, фармацевтикалық нанотехнологияның дамуына үлес қоспақ. Жоба туберкулез індетімен күресуге бағытталған, – деді Альдана Ғалиқызы.
Айта кеткен жөн, туберкулез – әлем бойынша екінші орында тұрған аса жұқпалы инфекциялық ауру. Ағзаның әлсіреуі кезінде белсенді күшке енетін аурумен күрес – дамушы елдер үшін де өзекті.
Ербол ЕРБОЛАТ,
Ortalyq.kz
