Қарағандыда көпбалалы аналар баспаналы болды

Қазақстан халқының бірлігі күні аясында қарағандылық көпбалалы отбасылар баспаналы болып, қоныс тойларын атап өтті. Дәл осы күні облыс аумағында 27 отбасыға пәтер кілті табысталды. Сондай-ақ, кеншілер шаһарындағы «Үш жапырақ» тұрғын үй кешеніне алғашқы 10 отбасы қоныстанды.  

— Баршаңызды Қазақстан халқының бірлігі күнімен шын жүректен құттықтаймын! Бұл ең мейірімді және жарқын мерекелердің бірі. Еліміздің ең басты байлығы — бейбітшілік пен келісімде өмір сүріп жатқан біздің халқымыз. Елбасының арқасында елімізде ұлтаралық келісімнің бірегей үлгісі, сенім, ынтымақтастық пен өзара түсіністіктің ерекше ахуалы қалыптасты. Бұл — біздің күшіміз.үгін біз тағы бір қуанышты себеппен жиналып отырмыз. Арамызда қазір бізбен бірге көп балалы отбасылар тұр, олар Қарағандының жаңа орталығының 24 қабатты жайлы тұрғын үй кешенінің алғашқы тұрғындары болады,  — деді аймақ басшысы Ерлан Қошанов.

Мереке күні Теміртау, Балқаш,   Саран, Шахтинск, Приозерск, Қаражал қалаларында және Абай, Бұқар Жырау, Қарқаралы, Жаңаарқа, Нұра аудандарында тұратын көпбалалы отбасыларға да пәтер кілттері табысталды.