Қарағанды тұрғыны елімізде бірінші болып жастарға арналған жеңілдетілген шағын несие алды
Қарағандылық Мөлдір Тайлақова елімізде жастарға жеңілдетілген микрокредит беру бағдарламасы бойынша өтінімі мақұлданған бірінші адам болды. Отыз екі жастағы кәсіпкер сұлулық салонын ашу үшін жылжымайтын мүлік сатып алуға жылдық 2,5%-бен 5 млн теңге алды.
Қарағанды облысында жеңілдетілген шағын несиелендіруге құжаттарды қабылдау 2023 жылдың 1 наурызында басталды. Бүгінгі таңда жас кәсіпкерлерден 31 өтінім келіп түсті. Тоғыз қарағандылық мал шаруашылығымен айналысуды жоспарлап отыр, 13-і қызмет көрсету саласында жұмыс істегісі келеді, жетеуі саудамен және біреуі жеңіл өнеркәсіп пен өсімдік шаруашылығы саласында айналысқысы келеді. Қарағанды өңірінің кәсіпкерлерін қолдау үшін биыл 324 шағын несие бөлінді. Бірінші жеңілдетілген қарызды Қарағандының тұрғыны Мөлдір Тайлақова алды.
– Мен тырнақ қызметі мен кірпік саласында шамамен 6 жыл қызмет көрсетіп келемін. Көптен бері өз ісімді ашуды жоспарлаған едім. Жеңілдетілген несиелеу бағдарламасы туралы жаңалықтардан естідім, қатысуға шешім қабылдадым. Мен алдымен талаптар туралы білдім, содан соң мұқият дайындалдым. Облыстық әкімдікте комиссия алдында өз жобамды қорғадым. Барлығы оңай өтті, – дейді Мөлдір Тайлақова.
Жаңа бағдарламаның бастамашысы ҚР Еңбек және халықты әлеуметтік қорғау министрлігі болды. Несиелерді “Аграрлық несие корпорациясы” АҚ береді.
21 жастан 35 жасқа дейінгі кәсіпкерлер жеңілдетілген қарыз алуға үміткер бола алады. Бұл ретте қатысушылардың жасы Аграрлық кредиттік корпорацияға өтініммен жүгінген кезде ескеріледі.
Жылдық 2,5%-бен шағын несиелер жас кәсіпкерлерге өз ісін ашуға немесе кеңейтуге беріледі. Кез-келген салада бизнес жасай аласыз: қызметтер мен өндірістен бастап ауыл шаруашылығына дейін.
Микрокредиттің мөлшері 5 млн теңгеге дейін, ал қатысудың ең ұзақ мерзімі – 5 жылдан (кез келген мақсатқа) және 7 жылға дейін (мал шаруашылығындағы жобалар үшін) жетуі мүмкін.
Микрокредит мерзімі ұзақтығының үштен бірінен аспайтын негізгі борыш пен сыйақыны өтеу бойынша жеңілдікті кезең беріледі.
Міндетті шарттар – жеке кәсіпкердің 5 жылдан аспайтын еңбек өтілі және кепілмен қамтамасыз етудің болуы. Соңғысы ретінде жылжымалы (мамандандырылған техника) және жылжымайтын мүлік қабылданады. Кепілдік болмаған жағдайда кепіл берушіні (ата-аналарын, туыстарын және т. б.) тартуға болады.
Микрокредиттер арнайы комиссияның шешімі негізінде беріледі, онда үміткерлер өздерінің бизнес-жобаларын таныстырады.
Ербол ЕРБОЛАТ,
Ortalyq.kz
