Алаяқтар айылын жияр емес

Теміртау қаласының Шығыс полиция бөліміне 77 жастағы қала тұрғыны хабарласып, шотынан белгісіз біреулердің 11 миллион 450 мың теңгені жымқырғанын мәлімдеген.

Криминалдық полиция қызметкерлерінің жедел іздестіру шараларының арқасында 62 және 70 жастағы екі күдікті әйел ұсталды. Олар зейнеткердің сеніміне кіріп, пәтерін жинап, тамағын әзірлеп беріп жүрген. Сонымен бірге зейнеткер әйелдерге сенім артқаны сонша, банк картасын да жиі беріп, азық-түлік алдырып тұрған. Ұсталғандар қылмысын толық мойындап, қамауға алынды.

ҚР Қылмыстық кодексінің 190-бабы «Алаяқтық» бойынша сотқа дейінгі тергеу амалдары жүргізілуде.

Ілияс ДҮНГЕНБАЙҰЛЫ