Адам капиталы және техникалық білім
Қарағанды индустриялық университетінде «Адам капиталын, техникалық білім беруді, инженерлік ғылым мен инновацияларды дамыту – мемлекет қызметінің стратегиялық бағыты» атты LVI Республикалық ғылыми-тәжірибелік конференциясы өтті. Шара Қазақстан Республикасы Ұлттық инженерлік академиясының 35 жылдығына орайластырылып, ғалымдарды, оқытушыларды, мемлекеттік орган мен бизнес өкілдерін, сондай-ақ, халықаралық ғылыми қоғамдастықтың басын қосты.
Конференция Қазақстан Республикасы Ұлттық инженерлік академиясының қолдауымен өтіп, алғашқы сәттен бастап инженерлік ғылымды, білімді және адам капиталын дамыту мәселелерін талқылауға салмақты әрі іскерлік бағыт берді.
Қатысушыларға Түркі әлемі математикалық қоғамының және Қазақстан Республикасы Математикалық қоғамының президенті, Қазақстан Республикасы Ұлттық инженерлік академиясының президенті, академик, Қарағанды индустриялық университетінің құрметті профессоры Бақытжан Жұмағұлов құттықтау сөз жолдады. Өз үндеуінде ол инженерлік кадрларды даярлау ел экономикасын жаңғыртудың негізгі шарттарының бірі болып қала беретінін атап өтті.
Пленарлық мәжіліске құрметті қонақтар, соның ішінде химия ғылымдарының докторы, академик Е.Бөкетов атындағы Қарағанды ұлттық зерттеу университеті химия факультетінің деканы Марат Ибраев, сондай-ақ, техника ғылымдарының докторы, профессор Қабидолла Сарекенов қатысты. Қатысушылар отандық және шетелдік сарапшылардың заманауи инженерлік шешімдерге, жаңа білім беру тәсілдеріне және инновациялық технологияларға арналған баяндамаларын тыңдады.
Маңызды оқиғалардың бірі ретінде ынтымақтастық туралы екі меморандумға қол қойылды. Біріншісі – Қарағанды индустриялық университеті мен Constructor University арасындағы келісім, ол академиялық алмасу мен бірлескен ғылыми жобаларға жол ашады. Екіншісі – «Таза Қазақстан» жобасы аясында университет облыстың экология департаменті және «Гордорсервис-Т» ЖШС арасында жасалды. Бұл келісім экологиялық мәселелерді шешуге және «жасыл» технологияларды енгізуге бағытталған.
Марапаттау рәсімі конференцияның маңызды бөлігіне айналды. Ғылым мен білімнің дамуына қосқан үлесі үшін университеттің ғалымдары, оқытушылары мен қызметкерлері ерекше аталып өтті. Қазақстан Республикасы Ұлттық инженерлік академиясының мүше-корреспонденттері дипломдары, сондай-ақ, ҚР Ғылым және жоғары білім министрлігінің, Теміртау қаласы әкімдігінің марапаттары және «Ғылым үздігі» құрмет дипломдары табыс етілді.
Сондай-ақ, іс-шара аясында жаңа білім беру және ғылыми кеңістіктер ашылды. Олардың қатарында символикалық түрде алғашқы «дубльмен» іске қосылған «Intellect Media Hub» бейнежазу студиясы бар. Ол студенттердің цифрлық дағдыларын дамытуға және білім беру мазмұнын жасауға көмектеседі. Сонымен қатар, студенттердің практикалық дайындығын нығайтуға және қолданбалы зерттеулер жүргізуге арналған «Тамақ өнімдерінің технологиясы» және жылу-масса алмасу қондырғылары зертханасы атты екі заманауи зертхана ашылды.
Конференция жұмысы секциялық мәжілістерде жалғасып, онда нанотехнологиялар мен цифрландырудан бастап экология мен тұрақты дамуға дейінгі кең ауқымды тақырыптар бойынша 200-ден астам баяндама ұсынылды. Талқылауларға Қазақстанның ғалымдары, оқытушылары, докторанттары, магистранттары мен студенттері, сондай-ақ, Германия, Оңтүстік Корея, Ресей және Беларусь университеттерінің өкілдері қатысты. Сонымен қатар, университеттің ғылыми жетістіктері мен жобаларының көрмесі жұмыс істеп, қатысушылардың үлкен қызығушылығын тудырды.
Қазақстан Республикасы Ұлттық инженерлік академиясының Қарағанды филиалының рөлі ерекше атап өтілді. Қарағанды филиал ғылыми бастамаларды қолдап, ғалымдар мен практиктердің басын біріктіреді және аймақ өнеркәсібімен тығыз байланыста қолданбалы зерттеулердің дамуына ықпал етеді.
Гүлдана Даирбекова,
Қазақстан Республикасы
Ұлттық инженерлік академиясы Қарағанды филиалының
ғылыми хатшысы, PhD
