Қазыбек би – ел бірлігінің бастаушысы
2011 жылдың қазан айының 10-ы күні Қазақстан Республикасы Тәуелсіздігінің 20 жылдығы қарсаңында Қарағанды қаласы әкімшілігінің алдындағы алаңда Қазыбек би (1665-1763 ж.ж.) бабамыздың ескерткішінің ашылу салтанаты болды. Еңселі ескерткіштің ашылу шарасына мемлекет және қоғам қайраткерлері мен Парламет Сенаты және Мәжіліс депутаттары, сондай-ақ, өнер және мәдениет өкілдері, би атаның ұрпақтары қатысты.
Облысымыз жердің тұтастығын, елдің береке-бірлігін, ынтымағын ту етіп көтерген тарихи тұлғадан кенде емес. Солардың бірегейі – атағы алты Алашқа тараған Қаз дауысты Қазыбек би бабамыз. Ол қара қылды қақ жарған, әділ билігімен ел есінде сақталған мемлекет және қоғам қайраткері. Қазыбек би – қазақ мемлекеттілігін қалыптастыруына, Тәуке ханның заңдар жинағын (Жеті Жарғы) шығаруға белсене үлес қосқан, үш жүзді біріктіру туралы бастама жасаушылардың бірі. Еліміз бен жеріміздің тұтастығын сақтауға және ел бірлігі мен ынтымағын ту етіп көтерген кемеңгер. Қазыбек Келдібекұлының ескерткішінің авторы – қарағандылық танымал мүсінші – Мұрат Мансұров. Өнер шебері әділ билігімен даңқы шыққан Қазыбек би бабамыздың болмыс-бітімін жан-жақты ашып көрсетуге тырысқан. Ескерткіш облыс әкімдігі мен «Қазақмыс» корпорациясы» арасында жасалған, өзара ынтымақтастық туралы меморандум шеңберінде бөлінген 33 миллион теңгеге тұрғызылды.
Қаз дауысты Қазыбектің қоладан құйылған ескерткішінің биіктігі – 6 метр, тұғырымен қоса есептегенде – 14 метр. Қаздауысты Қазыбектің жоғары көтерілген оң қолы халқына тура бағыт сілтеп, жөн көрсетсе, сол қолына заңдар жинағын ұстап тұр.
Басындағы – мұра қалпағы оның Орта жүзден екенін көрсетеді.
Бұл ескерткіш – облысымызда ғана емес, бүкіл Қазақстанның тарихи, мәдени өмірінде маңызды орын алады.
Жұлдыз ТОЙБЕК