Дүниежүзілік қоршаған ортаны қорғау күні қарсаңында «Коунрад» корпоративтік қоры құрылтайшылармен – «Сары Қазына» ЖШС және «Медная компания Коунрад» ЖШС бірлесіп экологиялық акция өткізді.
Қор қызметкерлері Ыбырай Алтынсарин атындағы №25 мектеп және №3 мектеп оқушылары арасында «Менің жасыл әлемім» тақырыбында сурет байқауын ұйымдастырды. Іс-шараның негізгі мақсаты – оқушылар арасында экологиялық мәдениетті, әлеуметтік және экологиялық жауапты азаматтарды тәрбиелеу.
Ұйымдастырушылар сурет байқауынан бұрын Балқаш өңірінде «Қызыл кітапқа» енген жануарлар, құстар туралы айтып, оларды қорғау қажеттігін атап өтті. Олар дала қызғалдақтарын, оның ішінде, олардың Балқаштың символына айналғандығын, гүлдердің нәзіктігіне, оларды қорғауға мұқтаж екендігіне ерекше тоқталды.
Қылқалам шеберлері белсене қатысқан «Менің жасыл әлемім» байқауының салтанатты марапаттау шарасы Қоңырат мөлтек ауданындағы қос білім ұясында өтті. Бұл байқау балаларға қоршаған ортаны қорғау қажеттілігін ескертеді, болашақ ұрпақ үшін табиғи ресурстар мен табиғат байлығын сақтауға қызықтыра отырып, өз ойларын ашық, көркем түрде білдіруге мүмкіндік берді. Қатысушылар екі жас ерекшелігі бойынша бақ сынасты. Жалпы, 115 жұмыс қабылданып, жүзден жүйрік 12 жұмыс жеңімпаз атанды.
Жеңімпаздарға құттықтау сөзін жеткізген «Коунрад» корпоративтік қорының Президенті Ник Ширли табиғатты қорғау – адамзаттың борышы екендігін атап өтті.
– Табиғатты қорғау қарапайым дүниеден басталады деп ойлаймын. Мәселен, жас ұрпақты табиғатты қорғауға тәрбиелеу ұлттық негіздегі мектептен басталады. Табиғат пен қоршаған ортаны қорғаудың жолдарын ұғындыру, жалпы халықтың экологиялық сауатын ашу, жастарға үздіксіз білім беру нәтижесінде ғана шешіледі. Біз бәріміз де – табиғатты қорғауда, сақтауда және оны дұрыс пайдалануда ұрпақ алдында, тарих алдында жауаптымыз. Бүгінгі оқушылардың суреті біз нұсқаған тақырыпты ашқандығына қуаныштымын, – деді Ник Ширли.
№3 мектептің 1-5 сынып оқушылары арасында I орынға Бақдәулет Дәулетбек, II орынға Аружан Дәулетова, III орынға Амина Лекасова, Кира Мухитова, Замир Есембеков тұрақтады. 6-10 сыныптар арасында I орынды Нұрали Төлеуғазы, II орынды Жанель Халий иеленді. Ыбырай Алтынсарин атындағы №25 мектептің 1-5 сынып оқушылары арасында I орынды Айзере Мэденят, II орынды Ақерке Ерболатқызы, III орынды Али Қуанышұлы мен Каусар Еркін иемденді. Сонымен қатар, жоғары сынып оқушыларының ішінде Айша Сәдуақасқызы топ жарып, I орынды еншіледі. Жеңімпаздарға дипломдар мен JBL фирмасының сымсыз құлаққаптары, Қор логотипі бар фирмалық рюкзактар табысталды. Сондай-ақ, барлық қатысушыларға «Қазақстан» шоколады таратылды.
Нұрдос КӘРІМ,
БАЛҚАШ
Ortalyq.kz
