Корт іске қосылады

Бұқар жырау ауданының Үміткер аулында жақында корт пайдаланылуға беріліп,іске қосылады.Қазірде 20х40 шаршы метр алаңқайда салынып жатқан осы нысанды жарықтандыру жұмыстары ғана қалды.

Бұл кортка тапсырыс беруші Үміткер ауылдық округінің әкімдігі болса, оның мердігері «StroiDos» ЖШС болып табылады. Жобалық-сметалық құны 13 миллион теңге тұратын нысанның бүгінде сырты қоршалып, көгал жабындысы төселіп, хоккей қақпалары қойылып, жоспарлы шаруаның 90 пайызы орындалған.

Енді оның алаңына су құйылып, қатырылып, үміткерліктер хоккей ойнайтын күндері алыс емес. Ал жазда бұл жерде футбол, волейбол, баскетбол ойындары өтеді.

– Алдағы жылы корттың сыртынан балалардың ойын алаңын салу да жоспарымызда бар. Қазір оның да жобалық-сметалық құжаттары әзірленуде. Ол жұмыстарды да жоғарыдағы мердігер атқарады, – дейді Үміткер ауылдық округінің әкімі Ерсін Зәлелов.

Ержан ИМАШ,
Бұқар жырау ауданы.
Ortalyq.kz