Кооперативтер көбейе түседі
Биыл Қарағанды облысында 37 ауыл шаруашылығы кооперативі құрылмақ. Бұл туралы облыстық ауыл шаруашылығы басқармасының басшысы Юржан БЕКҚОЖИН мәлімдеді.
– Үстіміздегі жылы 37 кооперативті іске қосу жоспарлануда. Бүгінде 5 кооператив жұмысын бастады. Наурыз айының соңына дейін 15-ін құрып, жыл аяқталғанша тағы 22-сі тиісті жұмыстарына кіріспек. Бұл мақсатта мемлекеттен 3,5 млрд. теңге бөлініп отыр, – деді Юржан Асанұлы.
Былтыр Қарағанды аймағында 8 кооператив құру көзделген еді. Іс барысында олардың саны екі есеге ұлғайып, 17-ге жетті. Кооперативтердің тиімділігі сол, ұсақ шаруашылықтар біріге отырып, мемлекеттік қолдауға ие бола алады.
Сондай-ақ, кооперативтер құру арқылы базардағы алыпсатарлардың жолын қию мүмкіндігі туады. Яғни, дүкендердегі ет бағасы арзандайды деген сөз.
Нұрқанат ҚАНАФИН