Дәстүрлі дода
Теміртау қаласы «Арселор Миттал» спорт кешенінде Ұлттық Қауіпсіздік комитеті органдарының қызметкері, полковник Жақан Медеубаевты еске алу құрметіне орай, волейболдан XXI халықаралық турнир өткізілді.
Осындай турнирді ҚР ҰҚК Қарағанды облысы бойынша департаменті жергілікті атқару органдарымен бірігіп, 1996 жылдан бері өткізіп келеді.
Осыдан 21 жыл бұрын турнирге 8 команда жиналса, турнир 2001 жылдан бері халықаралық мәртебеге ие болды.
Жақан Мұқатайұлы – Қарағанды облысы, Шет ауданының Ақсу-Аюлы ауылында 1941 жылы 11 шілдеде дүниеге келген. Қарағанды политехникалық институтын аяқтап, КСРО Ұлттық Қауіпсіздік комитеті органдарына шақырылғанға дейін геология саласында қызмет еткен. Қызмет еткен жылдары Жақан Мұқатайұлы салауатты өмір салтын кеңінен насихаттап, аймақта волейболдың дамуына үлкен үлес қосқан. Оның жетекшілігімен ҚСРО МҚК жоғары курстарының волейбол командасы Минскіде, кейіннен Қазақ КСР Ардагерлер құрама командасы көптеген сайыстарда жүлделі орындарға ие болған.
ҚР ҰҚК ардагері Жақан Мұқатайұлының досы Машан Юсупов турнирдің өткізілуіне қолдау көрсетіп жүр. Турнирді ұйымдастыруға Жақан Мұқатайұлының жақын туыстары, қызметтегі әріптестері және облысымыздың спортшы қауымы да белсенді ат салысады.
Чемпионаттарға әлеуетті құрылым ардагерлері мен қызметкерлері, республикамыздың және жақын шетелдердің жетекші спортшылары қатысады.
Сайыс мақсаты – Ұлттық қауіпсіздік комитеті органдарының өмірден озған қызметкерлерін еске алу, ұрпақтар сабақтастығын қолдау және Қазақстанда волейболды көпшілікке насихаттау.
Биылғы турнирге Новосибирск, Бішкек, Ақтау қалалары командалары, Қарағанды облысы ІІД командалары, сонымен қатар, «Қарағанды-Жарық» ЖШС, «КазТрансОйл» АҚ, «АрселорМиттал Теміртау» АҚ және Астананың ҰҚК мен Гвардия қызметкерлерінің командалары қатысты.
Турнирдің Ұлттық Қауіпсіздік комитеті органдарының 25 жылдық мерейтойы қарсаңында өткізілуі шараға ерекше мәртебе берді.
ҰҚК Қарағанды облысы бойынша департаментінің бастығы, генерал-майор Кендебай Адамбеков қатысушыларды құттықтап, шараны ашты. Теміртау қаласының әкімі Ғалым Әшімов сайыс қатысушыларына сәттілік тіледі. Жақан Мұқатайұлының жұбайы – Мара Медеубаева турнир ұйымдастырушыларына алғысын білдірді.
Ойын төрешілігін Қазақстан Республикасының еңбек сіңірген жаттықтырушысы, жоғары санатты ұлттық төреші Қуаныш Тыныбаев қамтамасыз етті.
Ардагерлердің арасында 1 орынға – Новосибирск командасы, 2 орынға – «АрселорМиттал Теміртау» АҚ командасы, ал 3 орынға Бішкектен келген команда ие болды.
Жастар командаларының арасында 1 орынды – «АрселорМиттал Теміртау» АҚ спортшылары, 2 орынды – «КазТрансОйл» АҚ, 3 орынды «Гвардия-Астана» командасы жеңіп алды.
Чемпионат жүлдегерлеріне кубоктар, медальдар, марапаттау қағаздары мен бағалы сыйлықтар табысталды.
ӨЗ ТІЛШІМІЗДЕН.