Алғашқы алтын – қоржында
Ел құрамасы Жапонияның Саппоро қаласындағы VІІІ Қысқы Азия ойындарының үшінші жарыс күнін (21 ақпан) төртінші сатыда тәмамдады. Қоржында – 1 алтын, 2 күміс, 1 қола жүлде.
Сейсенбі күні қазақстандықтар алғашқы алтынға қол жеткізді. Шаңғышы Ринат Мухин 15 шақырымдық бәсекеде қара үзді.
1000 метрге созылған конькишілер сынында Денис Кузин күмістен алқа тақты. Сондай-ақ, осы күні Елена Коломина қола медальді қанжығалады. Бұдан бір күн бұрын осы Коломина күміспен күптелген еді.
Ал, жалпыкомандалық есепте жарыс қожайындары көш бастап келеді. Жапондардың еншісінде – 23 медаль. 8 алтын, 8 күміс және 7 қола медаль иеленді.
Екінші орында – Оңтүстік Корея. Корей түбегінің өкілдерінде 20 медаль (6 алтын, 7 күміс, 7 қола). Үздік үштікті шығыстағы көршіміз Қытай елі түйіндеді. Қытайлар 5 алтын, 3 күміс және 5 қоланы олжалады. Бізден кейін Катар құрамасы орын тепті. Оларда жалғыз алтын бар.
Сөйтіп, ақ Азиаданың үш күнінде қатысушы 29 елдің арасында, тек, 5 мемлекет спортшылары жүлдегер атанды.
Конькиші жерлесіміз Екатерина Айдова, әзірге, жүлдесіз. Катя 1000 метрлік жарыста сегізінші нәтиже көрсетті. Бұйыртса, 1500 және 500 метрлік қашықтықтарда сынға түседі.
Азиада 26 ақпанда аяқталады.
Нұрқанат ҚАНАФИН