Үздік дәрігерлерге 1 мың АЕК мөлшерінде біржолғы төлем аударылады
Елімізде үздік дәрігерлерге қолдау көрсетілмек. Атап айтқанда, еңбегі сіңген ақ халаттыларға мемлекеттік және ведомстволық наградалар берілмек. Бұл туралы ҚР Денсаулық сақтау министрі Ажар ҒИНИЯТ Мәжілісте «Қазақстан Республикасының кейбір заңнамалық актілеріне денсаулық сақтау мәселелері бойынша өзгерістер мен толықтырулар енгізу туралы» заң жобасын таныстыру кезінде мәлімдеді.
Оның айтуынша, заң жобасы аясында «Қазақстан Республикасының еңбек сіңірген дәрігері» бағыты бойынша жылына 3 атақ беріледі. Бұл тұрғыда 1000 айлық есептік көрсеткіш мөлшерінде біржолғы төлем ұсынылып отыр. Сондай-ақ саладағы үздік маман атты республикалық конкурстың 17 жеңімпазына 500 айлық есептік көрсеткіш мөлшерінде төлем аударылады.
«Жыл сайын медицина қызметкерлерінің күнінде елімізде ең үздің дәрігерлер анықталады. «Үздік ауыл дәрігері», «Үздік жалпы практикадағы дәрігер», «Үздік хирург» және басқа да мамандарды анықтап келдік. Енді заң жүзінде үздік дәрігерлердің марапаты белгіленіп, оларға айлық есептік көрсеткіш арқылы сыйақы беріледі», – деді Ажар Ғиният.
