Жобалар жүзеге аспай тұр

    Жезқазғандық кәсіпкерлердің стартап жобаларын қаржыландыру тоқтатылды. Бұл туралы Жезқазғанда өткен «Бизнестің жол картасы – 2020» бағдарламасын түсіндіру акциясы кезінде мәлім болды.

Бірқатар ірі банктің қатысуымен өткен шарада республика бойынша несиелендірілген стартаптардың 80 пайызға жуығы қайтарылмайтындығы айтылды. Банктер болашағы бұлыңғыр деп таныған жобаларды қаржыландыруға ниетті емес.

Жиын барысында «Халық банктің» Жезқазған филиалы басшысының орынбасары Қазбек Сыртанбеков «Стартаптардың тәуекелі тым жоғары және несиелерді қайтару төмен болғандықтан, мұндай жобаларды қаржыландыру тоқтатылды», – деп мәлімдеді.

«Қазком», «ЦентрКредит Банк», «Халық Банк» өкілдеріне кәсіпкерлердің сұрағы да көп болды. Мәселенің барлығы тиісті курстарын оқып, кеңестерін алған кәсіпкерлер өз істерін ашуға несие алу үшін банктерге барған кезде басталады екен. Керекті құжаттарды айлап, кейде жылдап жинайтын кездер болады. Осыншама шабылыстың арты көп жағдайда несиені растамаумен аяқталады екен.

Әркімнің себебі әртүрлі. Мысалы, кәсібін енді бастаған Алмагүл Амандықова стоматологиялық орталық ашқысы келген және жобаға 20 млн. теңге сұраған. Жобаның тиімділігін дәлелдеп шыққанына қарамастан Алмагүл «тиімсіз бизнес көзі» деген негіздегі банк шешімін қолына алған.

Тағы бір жас кәсіпкер Жәнібек Майлин азық-түлік дүкенін ашқысы келеді. Ғимарат алып, істі бастау үшін 10 млн. теңге сұраған. Кепілдікке 2 пәтер қойып отырғанына қарамастан, «гарант жоқ, бизнес жоба тиімсіз» деген жауап алған.

Ал, Абылай Тікбасов жүк тасымалдау қызметін бастағысы келеді. 2 «КамАЗ» көлігін алу үшін 20 млн. теңге қажет. Бірақ, бұл кәсіпкерге де несие берілмеді. Себеп – «бұл салада тәжірибесі жоқ, бизнес тиімсіз».

Бұндай мысалдар жетіп артылады. Жезқазғандық кәсіпкерлер бизнеске берілетін несиелердің шарттары жеңілдетілуі тиіс деп санайды. Елбасының биылғы Жолдауында бизнесті дамыту мәселесіне ерекше көңіл бөлінген. Екінші деңгейлі банктердің ыңғайы қалай болмақ – алаңдатып отырғаны осы.

Гүлім ОРАЗБАЕВА,

Қарағанды облысы

Кәсіпкерлер палатасының баспасөз хатшысы.