Елімізде геологтардың кәсіби мерекесі жыл сайын сәуір айының алғашқы жексенбісінде атап өтіледі. Бұл үрдіс биыл да жалғасын тапты. Мерекелік кеш геолог мамандығының қызығы мен шыжығын айшықтаған бейнекөрініспен басталды.

Салтанатты жиынға келген қауымды өнеркәсіп және индустриялық-инновациялық даму басқармасы басшысының орынбасары Арман Нұрмағанбетов, «Орталыққазжерқойнауы» ӨД басшысының міндетін атқарушы Нұрлан Мауқұлов және ҚарМТУ проректоры Сергей Ожигин құттықтады. Кеш қонақтары 2030 жылға дейінгі геология саласын дамыту тұжырымдамасын жүзеге асыру аясында Елбасының «Төртінші өнеркәсіптік революция жағдайындағы дамудың жаңа мүмкіндіктері» Жолдауына тоқталып, геологиялық ұйымдар үшін білікті кадрларды даярлауда елеулі үлес қосып жүрген ҚарМТУ ұстаздарының ұзақ жылдық еңбегін де назардан тыс қалдырмады.

Студенттер жанды дауыста ән шырқап, кешке көтеріңкі өң сыйлады.

Геологтардың еңбектері еленіп, ұлықталды. Форумның салтанатты бөлімінде Қазақстан Республикасының минералдық-шикізат базасын дамытуға қосқан үлесі үшін геология саласының қызметкерлері мен ардагерлері «Барлау үздігі», «Құрметті барлаушы» төсбелгілерімен, ҚР Индустрия және инфрақұрылымдық даму министрлігінің, аталған министрліктің геология және жер қойнауын пайдалану комитеті төрағасының Құрмет грамоталарымен және Алғыс хаттарымен, Қарағанды облысы әкімінің Құрмет грамоталарымен және Алғыс хаттарымен, «Орталыққазжерқойнауы» ӨД-нің және ҚарМТУ ректорының Алғыс хаттарымен марапатталды.

– Геологтар күні концерттік бағдарламамен ғана шектелетін. Былтырдан бері форум түрінде өтеді. Бұл – бізді ынталандырады. Мен де бүгін алғыс хат алып, қуанып тұрмын. Бұл форум көптеген мамандармен тәжірибе алмасуға таптырас мүмкіндік, – деді Нұрқазған кенішінің жетекші инженері, геология кафедрасының 2 курс докторанты Нұргүл Маханова.

Геология саласының қызметкерлері, докторанттар, магистранттар мен студенттер жұртшылық назарына өз баяндамаларын ұсынып, мамандықтарын сүйетіндігін көрсетті. Сондай-ақ, бүкіл ғұмырын ғылымға арнаған дарабоз ғалым Қаныш Имантайұлының да ерен еңбегі тілге тиек етілді.

Жәлел ШАЛҚАР.

Сообщение Кен барлаушылар ұлықталды появились сначала на «ORTALYQ QAZAQSTAN» газеті.

Оқытушылардың айтуынша, оқу орнынан алғаш «Профессорлар аллеясын» ашу – ҚарМТУ-дың негізін салған академик Әбілқас Сағынов шәкірттерінің бастамасы болатын. Сол дәстүр жалғасын тауып, биыл да ҚарМТУ оқытушылары академик Ә.Сағынов ескерткішінің жанынан профессорлар аллеясын ашты. Оған ҚарМТУ-дың дамуына елеулі үлес қосқан атақты ғалымдар қатысты. Аллеяда шырша ағашының 35 көшеті отырғызылып, әрбір ағаштың түбіне оны еккен профессордың есімдері жазылған тақтайшалар орнатылды. Сондай-ақ, аллеяны бойлай аймағымыздың ірі холдингі «Имсталькон-Теміртау» ЖШС-нің директоры Иван Георгиади тарапынан сыйға тартылған 111 ағаш – қайың, қарағайдың көшеттері отырғызылды.

Тарихқа көз жүгіртсек, университет студенттері мен ғалымдарының білім ордасының маңына ағаш отырғызу рәсімі ескіден келе жатқан дәстүр екен. Бұл жайлы жазбалар алғаш XVI ғасырдағы деректерде пайда болған. Оба ауруы мен құрғақшылыққа қарсы күресте жеткізілген жақсы нәтижелерді тарихта қалдыру үшін Испанияның Саламанки университетінің профессорлары мен білім алушылары Леон жолдарының бойында мыңдаған ағаш отырғызған екен. Содан бері жағымды дәстүр аталмыш оқу орнында да жалғасын тауып келеді.

Жиынға қатысқан ҚарМТУ ректоры Марат Ибатов: «Президентіміз Нұрсұлтан Назарбаевтың жақында жарияланған стратегиялық мақаласындағы «Туған жер» бағдарламасы – туған өлкенің жаңа мәдени нысандарын көгалдандыру және көркейтуді көздейді. «Профессорлар аллеясы» – Мемлекет басшысының бастамасын қолдай отырып, қаланы көріктендіру әрі экологиялық таза аймақ қалыптастыру мақсатында ұйымдастырылды», – деді.

ҚарМТУ жастары да бұл шараға белсенді қатысты. Аталмыш шара жастарға экологиялық тәрбие берумен қатар, өз өлкесі және білім ордасының тарихын терең білуді меңзеді. Сол арқылы еліне деген сүйіспеншілік сезімін қалыптастырды.

Аяулым СОВЕТ

Сообщение ҚарМТУ-да – профессорлар аллеясы появились сначала на «ORTALYQ QAZAQSTAN» газеті.

Ерсін – қазіргі Бұқар жырау ауданындағы Алғабас ауылының тумасы. Ерсіннің тегі – сөз бен дәулет дарыған тұқым. Қазақтың белді руы Қаржастың Алтынторы бұтағынан. Оның ішінде мыңды айдаған Өтебайдың Тыныбегі, оның ұлы болыс Есентайдың ұрпағы. Бұқар жырау осы Алтынторыдан тарайтынын көзі қарақты қауым біледі. Жастайынан оқуға зеректігін танытқан Ерекең жеткіншек шағынан поэзияға аңсары ауып, ауыл арасында «бала ақын» деген атаққа ие болды. Қоғамдық жұмыстарға белсене атсалысып, ел үмітін үкілеген жастардың біріне айналды.

Мектепті тәмамдаған соң Ерсін оқуын ҚарПТИ-де (қазіргі ҚарМТУ) жалғастырды. Осында жүріп дос жолықтырып, пікірлес тапты. Қанына біткен елгезектігінің, ұйымдастырушылық қабілетінің арқасында өз ортасында абыройға ие болды. Сол кезде құрылған «Жасқанат» поэзия клубының іргетасын қалауға атсалысты.

Бұл клуб қанатына жаңашыл жастар тобы жиналды. Клубтағы басқосуда әңгіме ел ертеңі, ұлт келешегі, қылышынан қан тамған қызыл империяның отаршылдық саясаты туралы өрбитін. Республика өмірінде болып жатқан әрбір оқиға осы жерде қызу талқыға салынатын. 1986 жылғы Желтоқсан оқиғасы клуб мүшелерінің ерекше назарында болды. Алматылық жастарға үн қосу мақсатында Қарағанды көшелеріне шығып, наразылық шараларын ұйымдастырды. Ерсін осы шерушілер басында жүрді.

Политехты тәмамдар жылы декан Ерсін Сағыновқа Мәскеуге барып, оқуын жалғастыруды ұсынады. Алайда, өзінен кейінгі шиеттей бауырларын жеткізуді ойлаған ол ұсыныстан бас тартады.

Оқу бітірген соң Қарағанды қаласының Октябрь ауданында тұрғын үй-коммуналдық шаруашылығы бөлімінде еңбек етеді. Кейін Шұбаркөл көмір разрезінде эксплутация бастығы қызметін атқарады. Осы қызметінде жүргенде әкесі Болат кенеттен көз жұмады. Мәңгілік сапар алдында Болат ақсақал Ерсінге бауырларына бас-көз болуды аманаттайды. Сөйтіп, әкесінің жетісін өткізгеннен кейін ауылға көшіп келеді.

Ауылға келіп, шаруа қожалығын құрады. Нарықтық қатынастың талаптарын түйсіне білген Ерсін алғашқы болып Бұқар жырау ауданында осы істі қолға алады. Бұл жерде, әрине, Бибітай анамыздың көпті көрген тәжірибесі көп жәрдемін тигізді…

Болат аға қайтқаннан кейін сегіз баланы жеткізу оңай емес екені белгілі. Аналарының жанкешті еңбегінің арқасында мектеп қабырғасындағы жеткіншектер оқуларын бітіріп, болашаққа қанат қақты. Әркім өмірдегі өз жолын тапты… Ана еңбегі ақталды. Бұл – 1993 жыл еді. Іскер, жігерлі жігіттің бастамаларына тәнті болған аудан басшылығы оны жыл өте Керней совхозының бас инженері қызметіне тағайындайды. Кейін «Керней – 2008» ДОАТ-ның президенті қызметін атқарады. Табысты еңбек етіп, жұртты тұрақты жұмыс орнымен қамтамасыз етті.

Бүгінде сол Ерсін арамызда жоқ. Жыл толды. Соңында өзі оқырман назарына ұсына бермейтін жыр жолдары, көзінің қарашығындай болған жұбайы Назгүл мен төрт баласы қалды. Жырлары – өзіне орнатқан мәңгілік ескерткіші болса, балалары – соңында қалған ізі. «Орнында бар оңалар» деген. Бүгінде балаларының алды отау құрып, соңғылары білім алуда. Ұлы Данияр Мәскеуде магистратураны тәмамдады. Үлкен қызы Динара Ломоносов атындағы ММУ-де магистратурасында оқуын жалғастыруда. Ортаншы қызы Аяулым ҚарМУ-дың «халықаралық құқық» факультетінің студенті. Тіл білімін тереңдету мақсатында Түркияда тәжірибеден өтіп келді. Ал, кенже қызы Арайлым гимназияның шәкірті.

Ерсіннің есімі – еңселі. Көзі тірісінде жақсылығы мен шарапатын өзін қоршаған жанға тигізе білген марқұмның жарқын бейнесі жамағат жадында мәңгі қалары сөзсіз. Ғұмырында жұрттың абыройы мен құрметіне бөлене білген Ерекеңнің келбеті – халық есінде.

«Жақсының аты өлмейді» деген осы болар…

Нұрқанат ҚАНАФИН

Сообщение Есімі – еңселі появились сначала на «ORTALYQ QAZAQSTAN» газеті.

ҚарМТУ суденттерімен қатар, жиын­ға Е.Бөкетов атындағы ҚарМУ, Қаныш Сәтбаев атындағы Екібастұз инженерлік-техникалық институты, С.Сейфуллин атындағы Қазақ агротехникалық университеті, Тараз мемлекеттік университеті, ҚазИГЗУ-дің студенттері және магистранттары қа­тысты. Жастар «ЭКСПО – 2017» халықаралық көрмесінің мүмкіндіктері, ТМД және ҚР елдеріндегі жастар саясаты және еліміздегі саяси ахуал және құрылыс технологиясының дамуы жөніндегі жобаларын, ұсыныстарын ортаға салды. Он бес секцияда энергия үнемдеу, геотехнология және гуманитарлық бағыттар бойынша ойларын жеткізді.

Әсіресе, «Болашақта біз қандай үйде тұруымыз мүмкін?» тақырыбы жастардың қызығушылығын туғызды. Жас зерттеушілер болашақта салынатын үй құрылысының экологиялық таза, әрі тез құрылып, жылдам сөгілетін құрылыс материалдарынан жасау мүмкіндіктерін алға тартты. Экономикалық тиімділігі де назардан тыс қалмады. Бұл ретте, үй ішін безендіруде қолданатын материалдардың құнын төмендету жолдарын ұсынды. «Ақылды үй» жүйесін енгізудің тиімді бағыттарды атап, автоматтандырылған тұрғын жайлардың электр жарығын үнемдеудегі артықшылықтары жайлы баяндады. Сондай-ақ, жас ғалымдар «ЭКСПО-мен» тікелей байланысты еліміздегі жылу электр станцияларында қолданылып жүрген қондырғыларды жаңғырту, жел энергетикасын географиялық, метео­ро­ло­гиялық және техникалық тұрғыдан дұрыс пайдалану жағына көңіл бөлді. Студенттік конференцияда жо­балардың басым көпшілігі ғылыми үлгі ретінде ұсынылғанымен, жастардың айтары бар әрі зерттегені көп екені жобаларынан көрінді. Дегенмен, бірқатар жас зерттеушілердің өз жұмыстарын дипломға дейін толықтырып, тәжірибе кезінде өндірістік жағдайда зерттеп көруге бел буғаны қуантты. Бастысы, студенттердің ғылыми-зерттеу жұмысына деген ынтасы басым. Сондай-ақ, олар таяуда өтетін «ЭКСПО–2017» көрмесіне ұсынылған жобалардың үлгілерін көруге асық екенін айтты. «Идеядан – шығармашылық туындайды, ал шығармашылық – ізденіске алып келеді, ал ізденіс пен еңбек шынайы зерттеу – жұмыстың көрінісі», – дейді олар. Осы мақсатта ҚарМТУ ұжымы конференциялық жинаққа бес жүзден астам жастың ғылыми еңбегін басып шығармақ.

Аяулым СОВЕТ

Сообщение Идеядан – iзденiске появились сначала на «ORTALYQ QAZAQSTAN» газеті.

Спартакиадаға Е.Бөкетов атындағы ҚарМУ, ҚММУ, ҚарМТУ, Қарағанды индустриялық университеті, Орталық Қазақстан академиясы, Б.Бейсенов атындағы Қарағанды академиясы, Қарағанды экономикалық университеті, Болашақ академиясы, Ө.Байқоңыров атындағы Жезқазған университетінің құрама командалары қатысты.Студенттер спорттың қысқы президенттік көпсайыс, футбол, волейбол, баскетбол, қазақ күресі, үстел теннисі, шахмат, дойбы, тоғызқұмалақ, жеңіл атлетика, асық ату түрлерінен сайысты. Жеңіс тұғырынан көрінген жүлдегерлер жалпыкомандалық есепте кубок, дипломдармен және жеке сайыстар бойынша түрлі дәрежедегі бағалы сыйлықтармен марапатталды.

Болат ДҮЙСЕБАЕВ, ерлер волейболының жаттықтырушысы:

– Қарағандыда жоғары оқу орындары командаларының қатысуымен өткен дәстүрлі сайыста жалпыкомандалық есепте 210 ұпай жинаған ҚарМУ құрамасы жеңімпаз атанды. Соңғы он жылда Қарағанды мемлекеттік университетінің құрама командасы тек алдыңғы шептен көрініп келеді, әсіресе, қазақ күресінен. Бұл университеттің дене тәрбиесі және спорт факультеті оқытушыларының спорт саласындағы жүйелі жаттығуын аңғартады. Жүлделі екінші орынды ҚарМТУ, үшінші орынды ҚММУ құрама командалары иеленді. Сайыс тартысты әрі қызықты өтті.

Сөйтіп Е. Бөкетов атындағы ҚарМУ құрамасы жалпыкомандалық есепте облыстық ХІ спартакиада сайыстарында қазақ күресі, конькимен жүгіру спорты түрлерінен шебер ойын көрсетті. Университет командасы 2012 жылдан бері оқу орындары арасында біріншілік туын көтеріп келеді.

Аяулым СОВЕТ

Сообщение Жеңіс тұғырында появились сначала на «ORTALYQ QAZAQSTAN» газеті.

Жаңа индустрияландыруға әлем­дік деңгейдегі мамандарды өзі­мізден оқытып шығару идеясын Мемлекет басшысы ұсынған. Бұл бағдарламаны жүзеге асыру үшін ұлттық әл-ау­қат қорынан 10 млрд. теңге қарас­тырылған көрінеді.

2015 жылы МИИДБ-2 басым ба­ғыттары бойынша 11 базалық жоғары оқу орны анықталса, соның бірі – ҚарМТУ.

Соған орай, 2015 жылдық 1 қыркүйегінен бастап университетте «Ме­­­­­таллургиядағы нанотехнология» және «Робототехника. Басқару жүйе­­­­­­­лері» инновациялық білім беру бағдарламалары бойынша бейіндік магистратура аясында мамандарды даярлау жұмысы басталған екен.

Бұл білім беру бағдарламала­­рын әлемдік рейтингтің ТОП-500 қатарына енетін, еуропалық және ресейлік әріптестермен бірлесе отырып, бітіртуші кафедра профессорлары әзірледі. Магистрлерді даярлау үшін мемлекеттік білім гранттары бөлінді, әрбір мамандыққа – 62 грант. Болашақ мамандарды даярлаудың халықаралық стандарты оқу процесіне жаңа зертханалық жабдықтарды енгізумен қамтамасыз етілді.

Оқу жылы басталмас бұрын Университетте «Металлургиядағы инновациялық технологиялар лабораториясы» және «ҚарМТУ – Schneider Electric» авторландырылған оқыту ор­талығы жасалды. Олар еуропалық және американдық компаниялардың заманауи оқыту-өндірістік және ғылыми-зерттеу техникалық және бағ­­дарламалық кешендерімен жабдық­талған.

«Қазақмыс» Корпорациясы», «Ар­­селорМиттал Темиртау» АҚ, Құю зауыттарының өндірістік одағы, «Қарағанды Жарық», «Казпромавтоматика», «Караганда Энергоцентр» сияқты ірі кәсіпорындардың тапсырысы бойынша жасалған магистрлік жобалар сәтті қорғалды» деп хабарлайды баспасөз қызметі.

ҚарМТУ Ресейдің жетекші техникалық университеттерімен бірге, әлемдегі робототехникалар шығару­шы іргелі кәсіпорындардың бірі – «Фесто» (Австрия, Германия) концернінің қолдауымен, халықаралық «Синергия» білім беру жобасын жүзеге асыру ісінен едәуір тәжірибе жинаған. Сол тәжірибенің арқасында өндірістік үдерістерді автоматтандыру кафедрасының базасында бейіндік магис­тратураның жаңа «Робототехника. Бас­қару жүйелері» пәнаралық бағдарламасы жасалды.

Сала құраушы кәсіпорындардың тапсырыстары бойынша 64 магистрлік жоба қорғалды. Алғашқы түлектердің бәрі де жұмыспен қамтылған. Олардың төртеуі Ресейдегі маңдайалды жоғары оқу орындарының бірі – «ИТМО» ұлттық зерттеу университетінің (Санкт-Петербург) магистратурасында қос диплом бағдарламасы бойынша оқуларын жалғастырады.

Марат ИБАТОВ, ҚарМТУ ректоры:

– Қазақстанда «Металлургия­дағы нанотехнологиялар» және «Ро­­бо­­тотехника. Басқару жүйелері» инновациялық профильдері бо­­­йынша техника және технология­лар магистрі дипломы бірінші бе­ріліп отыр. Президенттің жаңа Жолдауында қойылған Қазақстанды жаңғыртудың үшінші кезеңі бойынша тапсырмаларды орындауға тікелей қатысу құрметіне ие болады түлектер. Біздің экономикамыздың жеделдетілген технологиялық жаңғыруы Төртінші өнеркәсіптік ре­­волюция жағдайларында өтеді. Төртінші өнеркәсіптік революция әр күн сайын қарқынды дамуда және өндірісті автоматтандыруға, жұ­мыс техникаларын дамытуға, нанотехнологияларға, «сандық фабрикаларды» құруға әкеліп соқтырады. Сондықтан, түлектер ғылыми-техникалық дамудың қайнарында болмақ.

Қызғалдақ АЙТЖАНОВА

Сообщение Бейіндік магистратура: алғашқы түлектер ұшты появились сначала на «ORTALYQ QAZAQSTAN» газеті.

Осы жыл еліміздің қоғамдық-саяси өміріндегі маңызды оқиғалардан басталды. Уақыт бір орында тұрмайды. Елімізді әрі қарай дамыту үшін болашақта өзінің тиімділігін көрсететін реформалар керек. Президент заманауи, қуатты мемлекет жүйесін құру үшін алдымызға нақты мақсаттар қояды және 31 қаңтардағы Жолдауында нақты әрекеттерді талап еттен бағыттарды атап көрсетті. Заманауи талаптарға жауап беру үшін біз барлық бағыттар бойынша үнемі жетіліп, жаңарып отыруымыз қажет. Бір сөзбен айтқанда – жаңғыру барлық бағытта жүргізілуі тиіс. Біздің еліміз кез келген күрделі тапсырмаларға дайын. «Ұлт Жоспары – 100 қадам» аясында атқарылған істер қаншама. Ендігі міндет – осы істі жалғастыру, – деді өз сөзінде қала басшысы Н.Әубәкіров.

Елбасының алдыға қойған міндеттерін шешу – қарағандылықтар үшін де ең бірінші мақсат болып табылады. Экономикалық саясатты және мемлекеттік бағдарламаларды жүзеге асыру облыс орталығының экономикасын дамытуда үлкен жетістіктерге жетуге мүмкіндік берді. Н.Әубәкіровтың мәлімдеуі бойынша Қарағанды қаласының төртінші индустрияландыруға төтеп беруге әлеуеті жеткілікті. Жаңа инновациялық жобаларды іздестіру үшін қаламыздағы оқу орындары – ҚарМУ, ҚарМТУ, Қазтұтынуодағы Қарағанды экономикалық университеті, сонымен қатар, «Сарыарқа» технопаркі бар. Кәсіпкерлікті қолдау мақсатында дәрілік заттарды сақтауға арналған «Лидер» ЖШС жобасы іске қосылған.

Дәстүрлі, базалық салаларға да көңіл ерекше көңіл бөлінуде. 2016 жылы қала экономикасының барлық секторлары қарқынды дамыды. Өндіріс көлемінің артуы да кәсіпкерлікті қолдауға кеңінен жол ашты. Машина құрастыру бойынша қаламызда атқарылған жобалар Елбасы Жолдауындағы тапсырмаларға тұспа-тұс келді.

Өңір экономикасының дамуына айтарлықтай әсер ететін кен игеру өнеркәсібіндегі процестер тұрақтандырылған. Қала ішін таза ұстауға мүмкіндік беретін айналма жолдарды салу жүзеге асырылуда. Бұдан басқа, қала экономикасын өркендету үшін жасалған ауқымды шаралар қаншама. Осының барлығы – еліміздің 30 дамыған елдің қатарына қосылу жолында, елдің әл-ауқатын жақсарту мақсатында жасалып жатқан орасан үлкен жұмыстар екені анық.

Кездесу барысында баяндама жасаған Банк коллдежінің директоры А.Букенов, «Қарағанды облысы кәсіпкерлер қауымдастығы» қоғамдық ұйымының вице-президенті Г.Құрбанбаева, «КазПласт» ЖШС директоры С.Вадько, Балалар мен жасөспірімдер сарайының директоры Ш.Алтынбекова, Қарағанды қаласы жастар ресурстық орталығының директоры Б.Бекмырзаев Елбасы Жолдаудында белгіленген міндеттерді табысты атқаруға бар күш-жігерлерін салатындықтарын айтты.

– Елбасының «Қазақстанның үшінші жаңғыруы: жаһандық бәсекеге қабілеттілік» атты Жолдауы – стратегиялық құжат. Бүгін біз өзіміздің мақсаттарымыз бен міндеттерімізді анықтадық, енді, оларды жүзеге асыруға кірісу керек, – деді қала әкімі Н.Әубәкіров жиын соңында. Сонымен қатар, ауыл шаруашылық және кәсіпкерлік бөліміне нақты тапсырмалар берді.

Салтанат ИЛЬЯШОВА

ҚАРАҒАНДЫ қаласы.

Сообщение Дамудың даңғыл жолында появились сначала на «ORTALYQ QAZAQSTAN» газеті.

Елбасы Нұрсұлтан Әбішұлы Назарбаевтың биылғы Жолдауында Қазақстанның Үшінші жаңғыру үдерісін қазіргі жаһандану жағдайында жүзеге асыру мәселесі көтерілген.

Жоғары білім беру жүйесіндегі қызметкерлері Президенттің әр Жолдауын басшылыққа алады, сондықтан, осынау аса маңызды бағдарламаны жүзеге асыруға біз неғұрлым белсенді ат салысуымыз керек.

Біздің университет техникалық мамандар даярлау мен жаңа жобалар жасау бағытында елімізде ғана емес, бірқатар мемлекеттердегі ғылыми орталықтармен бірлескен жұмыстарда да жетекші орындардың біріне ие, сол себептен бізге жүктелетін міндет те ерекше.

ҚарМТУ қазіргі уақытта ИИДМБ-2 үшін бейіндік магистратурада мамандар даярлап отырған он университеттің бірі болып табылады.

Біздің университеттің ғылыми бағдарламалары мен жобаларын әзірлеуге әр сала бойынша шетелдік жетекші мамандар қатысуда.

Ұлттық Қор қаражатының есебінен ақпараттық технологиялар мен өнеркәсіптік заманауи өндіріс саласындағы алдыңғы қатарлы әлемдік өндірушілерден заман талабына сай жабдықтар сатып алынды.

Президенттің 2016 жылғы Жолдауын жүзеге асыру шеңберінде, мем­лекеттік тапсырыстарға сәйкес, студенттерді тікелей жұмыс берушілердің араласып, қатысуымен оқыттық. Президент өзі атап көрсеткендей, бұл Үшінші жаңғыру жағдайында қазіргі индустрияның барлық салаларына жоғары білікті жаңа мамандар даярлауға мүмкіндік береді.

Біздің базамызда Президент бағдарламасын жүзеге асыру аясында, сонымен қатар, «Лейка Геосистемс», «Мицубиши-Электрик», «Фесто», «Шнейдер-Электрик» тәрізді технологиялық алыптармен бірлесіп, студенттерді, магистранттар мен инженерлерді оқыту орталықтары ашылды.

Дәстүрлі базалық салалар да ұмыт қалған жоқ. Кен-металлургия мен құрылыс кешендеріне, сонымен қатар, көлік саласына мамандар даярлау бұрынғыша жоғары деңгейде, бірақ енді Үшінші жаңғыру бағдарламасын жүзеге асыру шарттарына сәйкес орындалуда.

Әлемнің жетекші өндірушілері шығарған жабдықтарды пайдалана отырып, біз оқыту мен инновациялық жобалардың орындалуын қатар жүзеге асыратын бірегей зертханаларды іске қостық. Инновациялық әзірлемелер тұрақты жасалып, олар кейін металлургия, құрылыс, кен ісі, автоматтандыру, көлік және логистика салаларында өндіріске енгізіледі.

Осылардың арқасында біз Елбасы жаңа Жолдауында алдымызға қойып отырған міндеттерді ойдағыдай шешетінімізге және ҚарМТУ Үшінші жаңғыру кезеңінің міндеттерін орындауда өз үлесін қосарына мен сенімдімін.

Аристотель ИСАҒҰЛОВ,

Қарағанды мемлекеттік

техникалық университетінің

бірінші проректоры.

Сообщение ҚарМТУ өз үлесін қосады появились сначала на «ORTALYQ QAZAQSTAN» газеті.

Халықаралық байқауға қатысқан ҚарМТУ-дың студенті Диана Сейсенбекова «ХХІ ғасырдағы бейбітшілік символы» атты байқауда І орынға ие болды. Оның жетекшісі – ҚР Құрметті сәулетшісі С. Лебедев.

Жұмыстарды бағалау барысында, алдымен олардың тақырыпқа сәйкестігі мен көркемдік сапасы анықталған. ҚарМТУ-дың сәулет-құрылыс факультетінің студенті Диананың жұмысы көркемдік деңгейімен ерекшеленген.

Аяулым СОВЕТ

Сообщение ҚарМТУ студенті – жеңімпаз появились сначала на «ORTALYQ QAZAQSTAN» газеті.