Осы жылдың көктемінде Шет ауданының Ақсу-Аюлы ауылында орталық кәріз желілерінің құрылысы басталады. Жоба екі жылға есептелген.
Ақсу-Аюлы ауылында орталық кәріз құрылысы – көптеген тұрғындарды толғандырып келе жатқан мәселе. Олар желіні өткізуді аудан және облыс басшыларының халықпен кездесулерінде бірнеше рет көтерген. Өткен жылы олардың өтініштері назарға алынды. Жобалық-сметалық құжаттама әзірленді, қаржыландырудың бірінші траншы бөлінді. Жобаны іске асыру осы жылдың наурыз айында басталады. Мердігер де анықталған.
– Бұл екі жылдық жоба. Кәріз желілерінің жалпы ұзындығы 34,46 км құрайды, тазарту құрылыстары салынады. Сондай-ақ тұрғындарды сапалы ауыз сумен қамтамасыз ету үшін көктемде Еңбекшіл ауылында су құбырының құрылысы басталады. Қаржыландыру бөлінді, жұмыстар 2025 жылы аяқталады. Бүгінгі таңда сегіз елді мекенде су құбыры желілерін жүргізу жұмыстары жүргізілуде, – деді Шет ауданының әкімі Мұхит Мұхтаров Өңірлік коммуникациялар қызметі платформасында өткен брифингте.
Ауданның тағы сегіз ауылында 185 жарықтандыру тірегі орнатылады. Ауылішілік жолдарды орташа жөндеу басталады. Ақсу-Аюлы кезекте тұрғандарға арналған 24 пәтерлі көпқабатты үйдің және Ақсу-Аюлы мен С. Сейфуллин атындағы кентте әрқайсысы 300 орындық екі мектептің құрылысы жалғасады. Мектептер “Жайлы мектеп” республикалық жобасы бойынша салынуда.
– Бұдан басқа, сегіз елді мекенде мәдениет нысандарын жөндеу және демеушілік қаражат есебінен ангар типі бойынша тез салынатын спорт кешендерін салу жоспарлануда, – деп атап өтті Мұхит Мұхтаров.
Ауданда денсаулық сақтауды дамытуға көп көңіл бөлінеді. 14 елді мекенде 4 ФАП және 10 медициналық пункт салынады.
Аида РАХЫМҚҰЛОВА,
Ortalyq.kz
