Мемлекеттік қызметшілер және азаматтардың құқықтары қорғалуда

Мемлекетті өркендету, дамыту бағытындағы ең жауапты іс мемлекеттік қызметшілерге жүктелетіні мәлім. Мемлекеттік қызметшіге мұндай жоғары талап қойылса, оның құқықтарының қорғалуы және әлеуметтік кепілдіктерінің сақталуы да тиісті деңгейде болуы шарт.

Бұл ретте, Мемлекеттік қызмет істері агенттігінің Қарағанды облысы бойынша департаменті  басым бағыттарының біріне мемлекеттік қызметшілердің құқықтарын қорғау жатады.

Осы бағытты жүзеге асыру барысында Мемлекеттік қызмет істері агенттігінің Қарағанды облысы бойынша департаменті   тарапынан мемлекеттік қызмет саласындағы бақылау бағыты бойынша бірқатар талдаулар жүргізілді.

Тәртіптік практика материалдары зерделеніп, оның нәтижелері Әдеп жөніндегі кеңесте қаралды. Өз кезегінде, мемлекеттік қызметшілерді  тәртіптік жауапкершілікке тарту кезінде рәсімдік бұзушылықтарға жол  бергені үшін мемлекеттік органдардың 12 актісінің күші жойылды, ал жіберілген бұзушылықтар үшін кінәлі  тұлғалар тәртіптік жауапкершілікке тартылды.

Мемлекеттік қызметшілердің құқықтарын қорғаумен қатар азаматтардың құқықтарын қорғау мәселесі де жіті  бақылауда.

Мысалы, Департаментке азаматтар заңнама талаптарының бұзылуы, мемлекеттік қызметшілер тарапынан қызметтік әдеп нормаларын бұзу фактілері  бойынша сұрақтар көтерілген өтініштермен жиі жүгінеді.

 Барлық көрсетілген фактілер бойынша тексерулер жүргізіліп, оның барысында жекелеген фактілер өз растауын тауып, Департаментпен тиісті ден қою актілері енгізілді, оның қорытындысы бойынша жауапты тұлғалар жауапқа тартылып, азаматтардың бұзылған құқықтары қалпына келтірілді.

Бұдан басқа, Департамент мемлекеттік қызметтер көрсету сапасына және мемлекеттік қызметтер көрсету саласындағы заңнама талаптарының бұзылуына жол бермеуге, сондай-ақ, көрсетілетін қызметті алушылардың бұзылған құқықтары мен заңды мүдделерін қалпына келтіруге бақылау жүргізеді.

Ағымдағы жылы Департамент қызметкерлері 10-нан астам қызмет алушының бұзылған құқықтарын қалпына келтірді.

Жүргізілген бақылау іс-шаралары барысында мүлікке заңды құқықтарды тіркеу, құжаттарды рәсімдеу, жер беру, сәулет және қала құрылысы қызметі саласында бұзушылықтар анықталды.

Сондай-ақ, көрсетілетін қызметті алушылардың бұзылған құқықтарына жедел ден қою мақсатында «Sapaly Qyzmet»  телеграм-каналы ашылды, ол көрсетілетін қызметтерді алушылар тарапынан туындайтын сұрақтарға жедел ден қояды.

Осыған байланысты, құқықтарыңыз бұзылған жағдайда Департамент өз өкілеттіктері шеңберінде тиісті ден қою шараларын қолданатынын хабарлаймыз.

Тиісті өтініштермен сіздер Қазақстан Республикасы Мемлекеттік қызмет істері агенттігінің Қарағанды облысы бойынша департаментіне қағаз түрінде  (Қарағанды қаласы Нұрсұлтан Назарбаев даңғылы, 39), сондай-ақ, электрондық түрде «Е-Otinish» өтініштерді қабылдау және өңдеу платформасы, «Egov.kz» электрондық үкімет порталы арқылы жүгінуге құқылысыз.

Жандос СӘРСЕН,
ҚР Мемлекеттік қызмет істер агенттігінің  Қарағанды облысы бойынша  департаментінің басшысы.