Кедергілерден құтыламыз
2012 жылдың өзінде-ақ еліміз үшін елеулі қадам – латын әліпбиіне ауысу мәселесі белгілі болған еді. Міне, арада 5 жыл мерзім өтті. Дегенмен, осы жылдар аралығында «жабулы қазан жабулы күйінде қалып», бұл мәселе қозғалмаған еді. Алайда, Елбасымыздың «Болашаққа бағдар: рухани жаңғыру» мақаласы – бес жыл бұрын айтылған ойдың орындалар шағы келгенін жеткізді. Сөйтіп, Президент Нұрсұлтан Назарбаев тарихи қадам жасады.
Технологияға күн санап күрделі өзгеріс еніп жатқан 21 ғасыр ұрпағы үшін латын қарпіне ауысу – ауадай қажет еді. Ақпарат айдынына, ғылыми жаңалықтарға шолу жасау үшін де латын әліпбиін меңгерген артық болмайтыны белгілі. Ал, еліміз байырғы қаріптен бас тартып, түбегейлі латын әліпбиіне ауысар болса – біз бұл кедергілерден құтыларымыз сөзсіз. Медицина, технология, тіл білімі салаларында латын әліпбиі күн сайын алдымыздан шығады. Сондықтан, қаріптің ауысуы – Қазақстанды дамытады дегенге толық сеніммен қараймын.
Менің ойымша, Елбасы ұстанған ерекше саясаттың үлгісі елімізді жарқын болашаққа жетелейді. Ал, соның бір дәлелі – латын әліпбиіне ауысуымыз болмақ.
В.САРАНЧУКОВА,
«Взгляд молодых» ҚБ
басшысы.