Қаһарман рухына құрмет

Қарағанды қаласындағы 31775 әскери бөлімде Халық Қаһарманы Сағадат Нұрмағамбетовтің туғанына жүз жыл толуына орай салтанатты шара өтіп, әйгілі тұлғаға ескерткіш тас орнатылды.

Ұлы Отан соғысында асқан ерлігімен көзге түскен қолбасшы, Кеңес Одағының Батыры, Қазақстан Республикасының тұңғыш Қорғаныс министрі, армия генералы Сағадат Қожахметұлының өмір жолы 82 жыл бұрын құрылған осынау әскери бөлімнің тарихымен де тығыз байланысты екен.

Ал, Батырға арналған ескерткіш тастың авторы – қарқаралылық қолөнер шебері Манарбек Кәрім. «Астана» өңірлік қолбасшылығы әскерінің қолбасшысы, генерал-майор Ержан Ибраев өнер туындысының авторы ретінде салтанатты шараға арнайы шақырылған Манарбек Әзімбекұлын Алғыс хатымен және С.Нұрмағамбетовтің 100 жылдығына арналған төсбелгімен марапаттап, құрмет көрсетті.

Айта кетейік, 31775 әскери бөлімнен шыққан өзге де қаһармандардың есімдері тасқа қашалып, бөлімнің құрмет төріне қойылды. Отан алдындағы қастерлі борышын өтеп жүрген жас жауынгерлерді патриоттық рухта тәрбиелеуде бұл шараның маңызы зор деп білеміз. Сурет автордан

Болатбек ӘШІМҰЛЫ,
Ortalyq.kz