Қарсақпай кентінің оқушылары Жезді музейіне барды 

 Қарсақпай кентінің №15 мектебінің оқушылары Жезді кентіндегі Мәкен Төрегелдин атындағы тау-кен және балқыту ісі музейіне экскурсияға барды. Танымы мол шара «Рухани жаңғыру» бағдарламасы аясында ұйымдастырылған.

Музей қызметкерлері балаларға Ұлытау ауданының тарихы, мәдени мұрасы және табиғи байлықтары туралы айтып берді. 
— Оқушылар біздің музейден  көптеген қызықты және пайдалы ақпарат алды. Экскурсия жақсы әсер қалдырды деп үміттенеміз. Балалар біздің тарихымызбен және мәдениетімізге қатысты сұрақтарына жауап алды, — дейді музей қызметкерлері.

Олар осындай танымдық экскурсиялар балаларға туған өлкеге деген сүйіспеншілікті оятып, олардың зерттеу жұмыстарына деген қызығушылығын арттырады деп санайды.
Жезді кентіндегі тау-кен және балқыту ісі тарихы мұражайы 1994 жылдың 15 шілдесінде ашылды. Экспозиция 3 гектар алаңда ашық аспан астында, сондай-ақ көрме залдарында орналасқан.

Мұражай қорына тау-кен және балқыту ісінің тарихын, материалдық мәдениетті, этнография мен халықтың тұрмысын көрсететін 15 мыңнан астам сирек кездесетін және құнды экспонаттар кіреді.