Бұл сайыс 2015 жылдан бері өткізіліп келеді. Аталмыш шара ҚР Оқу-ағарту министрлігі, «Kazdidac» қауымдастығы, облыстық білім басқармасының мұрындық болуымен ұйымдастырылады.

Жыл сайын фестиваль ауқымы кеңейіп, бәсекелестік деңгейі артуда. Жарысқа мектепке дейінгі балалардан бастап педагогтарға дейін қатысу мүмкіндігі бар.

Жыл сайын фестивальдің дәрежесі күшейіп, бәсекелестік артып келеді. Тіркеу мен қорытындылаудың электрондық жүйесі, сондай-ақ тәуелсіз кәсіби судьялар алқасы өзгеріссіз қалады. Жарыстың бас төрешісі – Zerdeli (Астана қ.) білім беру орталығының директоры, бұрынғы Қарағанды облысының білім беруді дамыту оқу-әдістемелік орталығы директорының орынбасары Есбол Аринов.

Биылғы жылы финалға қатысушылар 17 санат бойынша бақ сынайды. Атап айтар болсақ, оның төртеуі – ойын-сауық номинациялары. Шығармашылық санатта қатысушылар «Робот-құтқарушылар» тақырыбында өз әзірлемелерін ұсынады. Жобалар әртүрлі құтқару операцияларына арналған роботтандырылған жүйелерді әзірлеумен және жасаумен байланысты болуы тиіс. Командалар табиғи апаттар, техногендік апаттар және жедел ден қою мен көмекті талап ететін басқа да жайттар секілді төтенше жағдайларда роботтарды қолдануды көрсететін жобаларды ұсынуы тиіс. Бұл роботтар адамдардың қауіпсіздігі мен құтқарылуын қамтамасыз ете отырып, күрделі және қауіпті жағдайларда тиімді жұмыс істеуге қабілетті болуы тиіс.

Х мерейтойлық фестивальде алғаш рет Fischertechnik өндірушісінің робототехникалық конструкторлары қолданылатын жарыстардың санаты ұсынылады.

Өткен жылдардағыдай жарыстың ақтық сайысы алдында Қазақстан мен Ресей өңірлерінде 18 іріктеу кезеңі өтті. Биыл іріктеу жарыстарына қатысқан топтардың саны рекордтық деңгейде болды. Еліміздің 5 облысынан, соның ішінде Қарағанды облысының 13 қаласы мен ауданынан және Ресей Федерациясының Серов қаласынан командалар қатысты. Іріктеу жарыстарында барлығы 1239 команда бақ сынасты, бұл 2000-нан астам қатысушы, финалдық жарыстарға рұқсат алған қатысушылар анықталды. Іріктеу жарысы өткізілмеген облыстардың командалары іріктеу сайыстары арқылы RoboLand-2025 финалына шығуы мүмкін. Оның нәтижелері 10 ақпаннан кейін белгілі болады. Айта кету керек, біліктілік іріктеуге жыл сайынғы қатысушылар – Өзбекстан мен Қырғызстан командаларынан өтініштер келіп түсті.

«RoboLand 2025» көрмесінде балалар жарыстарда өздерінің шеберліктері мен әзірлемелерін көрсетіп қана қоймай, бейресми жағдайда танысуға және әңгімелесуге мүмкіндік алады. Ол үшін Серік Сәпиев атындағы бокс орталығында «RoboLand PARTY» ойын-сауық бағдарламасын өткізу жоспарланған.

Сайттағы жаңалықтарды қадағалаңыздар www.roboland.kz.

Қосымша ақпарат алу үшін келесі телефон нөмірлеріне хабарласуға болады:

Тел ./Факс: +7 (7212) 41 51 94

Ұялы. тел.: +7 (776) 006 82 88

E-mail: roboland.kz@gmail.com

Материалды әзірлеген Аида РАХЫМҚҰЛОВА 

Сообщение Roboland-2025: Қарағандыда фестивальге дайындық басталды появились сначала на «ORTALYQ QAZAQSTAN» газеті.

Қарағанды облысында туризмді дамытуға көбірек көңіл бөлінуде. Қазіргі таңда туристік əлеуетті дамыту – Балқаштағы негізгі бағыттардың бірі болып отыр. Екі күнге созылатын жағажайдағы жайдарлы сәттер туризм тынысын одан әрі аша түсуге ықпал етеді деп күтілуде.

Ұйымдастырушылар таңертеңгі 10-нан түн ортасына дейін жалғасатын мәдени, спорттық және ойын-сауық шараларын дайындауда. Белсенді демалысты ұнататындар үшін йога және зумба кәсіби жаттықтырушыларымен таңертеңгілік сабақтар, ұлттық және жағажай спорт түрлерінен жарыстар өткізіледі. Балқаш желкенді регата, би фестивалі және көбік кеші болып, балаларға арналған театрландырылған ойын бағдарламалары, шеберлік сабақтары, байқаулар, викториналар жоспарланған.

Сондай-ақ ашық аспан астында кинотеатр ашылмақ, онда қазақстандық режиссерлердің мультфильмдері мен киноленталары көрсетіліп, танымал музыканттар, креативті жүргізушілер, диджейлер мен бишілер өнер көрсетеді.

Аида РАХЫМҚҰЛОВА,

Ortalyq.kz

Сообщение Балқаш көлінің жағажайында «БалқашTourfest – 2024» фестивалі өтеді появились сначала на «ORTALYQ QAZAQSTAN» газеті.

Аталмыш шарада С.Сейфуллин атындағы Қарағанды облыстық академиялық қазақ драма театрының актері Бауыржан Нұрмағамбетов «Қарагөз» қойылымында Нарша бейнесін үздік сомдағаны үшін «Үздік ер адам рөлі үшін» жүлдесі жеңіп алды.

Айта кетейік, С.Сейфуллин атындағы Қарағанды облыстық академиялық қазақ драма театрының Ұлттық театрлар бәйгесіне Ресейдің Вахтангов театрында, Европа театрларында режиссерлігімен шыңдалған қазақтың талантты режиссер қызы Гүлназ Балпейісова сахналаған Мұхтар Әуезовтің «Қарагөз» трагедиясын апарған. Нәтижесінде Ұлттық классиканы қазіргі күнмен заманауи үндестіріліп қойылған жаңа нұсқасын халықаралық белгілі сараптамалық кеңес мүшелері жоғары бағалаған.

Сонымен қатар, «Спектакльдің үздік музыкалық-пластикалық шешімі» номинациясы бойынша Ғ. Мүсірепов атындағы академиялық балалар мен жасөспірімдер театрының «Құлагер» қойылымы үздік деп танылды.

Негізгі номинациялар жүлделерімен қатар, Башқұртстанның атақты актерлері ерекше ойынымен танылған артистерге арнайы жүлделер де тапсырылды. Сәкен театрының актрисасы Әнел Сағындықова Қарагөз рөлі үшін фестивальдің осындай арнайы жүлдесіне ие болды.

Башқұртстанда өткен халықаралық театр мерекесіне Ресейдің түрлі өңірлерінен 15 театр, сондай-ақ Қазақстан мен Қырғыз елінің бірнеше театры қатысты.

«Туғанлық» фестивалі алғаш рет 1991 жылы республикалар мен Түркі әлемі елдерінің сахналық өнерінің жарқын және әсерлі мерекесі ретінде сахнаға шыққан. Кейіннен уақыт өте келе фестиваль көпмәдениетті мерекеге айналып үлгерген.

Аида РАХЫМҚҰЛОВА,

Ortalyq.kz

Сообщение Сәкен театры «Туғанлық» халықаралық фестивалінің арнайы жүлдесін жеңіп алды появились сначала на «ORTALYQ QAZAQSTAN» газеті.

Фестивальдің бірінші күнінде Ұлытау ауылының мәдениет үйінде «Едіге тау – ескі жұрт ескерткіші» атты ғылыми-тәжірибелік конференциясы өтті. Конференциядан соң қонақтар үшін Едіге тауына сапар ұйымдастырылды. Түскі астан соң дәстүрлі және ақындардың әндері байқауының іріктеу кезеңі өтті. Кешкі уақытта жастар үшін «Алтыбақан әндері» мерекесі ұйымдастырылды. Мұнда жастар алтыбақанда тербеліп, қазақ халық әндерін орындады.

15 маусымда «Көкмайса» этнофестивалі театрландырылған көрініспен ашылды. Дәл осы күні қолданбалы өнер бойынша шеберлік сыныптар, садақ ату, қатын күрес, аударыспақ, теңге алу, асау үйрету секілді ұлттық сайыстар ұйымдастырылды. Кешке сахнада ән орындаушылар байқауының ақтық сайысына шыққандар өнер көрсетті. Соңында жиналған қауым назарына гала концерт ұсынылды.

Фестивальдің соңғы күнінде қонақтар мен қатысушылар үшін Ұлытау тауларына экскурсия ұйымдастырылды. Тау бөктерінде атпен серуендеді қонақтар. Бұл күні сондай-ақ, көкпар, қыз қуу, аламан бәйге өтіп, фестивальдің жабылу салтанаты өтті.

«Көкмайса» этнофестивалін ұйымдастырудың басты мақсаты – Ұлытау ауданының туристік әлеуетін жоғарылату. Бұл шет елдік қонақтарды қазақ халқының тарихымен және мәдениетімен таныстырудың жақсы және көрнекті мүмкіндігі.

«Көкмайса» этнофестивалі алғаш рет 2018 жылы Жезқазғаннан 160 шақырым қашықтықта Ұлытау маңындағы Кененбай көлінің жанында өткен еді. Ол «Терісаққан көктемі» этнофестивалінің бір бөлігі болып табылады. Аталмыш шарада шет ел азаматтары танымалдылыққа ие болып, ЮНЕСКО және ИСЕСКО (Білім, ғылым және мәдениет мәселелері бойынша Ислам ұйымы) беделді халықаралық ұйымдарының назарын аударған.

Сообщение Ұлытауда екінші рет «Көкмайса» этнофестивалі өтті появились сначала на «ORTALYQ QAZAQSTAN» газеті.

Фестивальге былтырдан бері Қазақстан Республикасының Тұңғыш Президенті – Елбасы қоры демеушілік көрсетуде. Ұйымдастырушы – «Думан Әкім» өнер орталығы.

Шараның мақсаты – балалар мен жасөспірімдердің театр ұжымдарына тәжірибе алмасу арқылы қолдау көрсету, сондай-ақ, жетекшілерінің кәсіби шеберлігін арттыру.

• Биыл фестивальге 200-ге тарта талантты оқушылар, кәсіби білім алып жүрген студент жастар қатысты. Олар – Нұр-Сұлтан, Тараз, Жезқазған, Екібастұз, Көкшетау, Петропавл, Атбасар, сонымен қатар, Ресей Федерациясының Кемерово, Новосибирск қалаларынан келген. Байқауға Қазақстанның еңбек сіңірген қайраткері Қайрат Кемалов, Қырғызстанның Халық әртісі Сергей Матвеев, Тәттімбет өнер колледжінің жоғары білікті оқытушысы Любовь Попова қазылық етті, – деді фестивалді ұйымдастырушы Думан Әкім.

Екі күн бойы өнерпаздар «Көркем сөз» және «Спектакль» номинациялары бойынша сынға түсті. Әр номинация жеңімпаздары жас ерекшеліктері бойынша анықталды. Сонымен қатар, ерекше талантымен көзге түскен актерлерге жеке номинациялар бұйырды.

• Мұндай шаралар жастардың қиялына қанат бітіреді. Жастар дың алып келген туындылары патриоттыққа, достыққа, махаббатқа құрылған екен. Осы ұлы сезімдер жас таланттарды өз ісінің майталманы болуға тәрбиелері сөзсіз, – деді Абай атындағы Жамбыл гуманитарлық колледжі театр ұжымының тәлімгері, актер Ұлан Абзалиев.

Байқау қорытындысында «Спектакль» номинациясы бойынша 8 -10 жас аралығында II орын Қарағанды қаласының «TeatRoom» театр студиясына бұйырды.

11-13 жастағы өнерпаздардан құралған Қарағанды қаласының №2 өнер мектебі-ЮНЕСКО – Клубының «Алтын шашу» театр ұжымы бас жүлдені қанжығалады.

14-16 жыл жастағылар арасында да «Алтын шашу» театр ұжымы оза шауып бас жүлдені иеленді.

17-19 жас бойынша Көкшетау қаласының Ақан сері атындағы мәдениет колледжінің «Бос уақытты ұйымдастырушы-педагог» мамандығының 2 курс студенттерінен құралған театр ұжымы I орынды иеленсе, 20-23 жастағы өнерпаздар арасында Абай атындағы Жамбыл гуманитарлық колледжінің «Актер өнері» бөлімінің театр ұжымы жеңіс тұғырынан көрінді. Айта кету керек, бұл – фестивальдағы жалғыз қазақтілді ұжым.

«Көркемсөз» номинациясы бойынша 8-10 жас аралығында Қарағанды қаласының №2 өнер мектебі – ЮНЕСКО – клубының оқушысы Милана Шулятьева бас жүлдені жеңіп алса, 11-13 жас аралығында Қарағанды қаласының №1 өнер мектебі оқушысы Томирис Сұраншиева I орынды иеленді.

14-16 жастағылардан Атбасар қаласынан келген Балалар мен жасөспірімдер орталығының тәрбиленушісі Томирис Сексенбаева бас жүлдеге қол жеткізді.

17-19 жас бойынша Абай атындағы Жамбыл гуманитарлық колледжінің «Актер өнері» бөлімінің ұжымы I орыннан көрінді.

20-23 жас арлығында Дарья Иванова (Кемерово мемлекеттік мәдениет институты) бас жүлдені қанжығалады.

Жәлел ШАЛҚАР.

Сообщение Қиялға қанат бітірген фестиваль появились сначала на «ORTALYQ QAZAQSTAN» газеті.

Елбасы «Ұлы Даланың жеті қырын» ұсынғанын білмейтін қазақ жоқ. Алаш байтағының төрт құбыласындағы ән-күйді бір жерге тоғыстырса, Ұлы Даланың барлық сыр-сипатын ашпайды деп кім айта алар? Көшін Қарағандыға тіреген «Ұлы Даланың көне сарындары» фестивалінен туып отыр бұл ой.

Бекболат Тілеуханның әнді тарихымен әңгімелеп отырып жеткізетіні бар. Әр өңір мақамын жекежеке салып, Алаш даласын әнмен шарлап шығатұғын. «Қазақта Арқадағы ән Атырауға, Атыраудың әні Жетісуға, Жетісу мақамы Қаратау сарынына ұқсай бермейді» деп бастар еді. Сол сияқты, «Ұлы Даланың жеті қыры» атты дәстүрлі музыка фестивалінде Жетісу, Сыр өңірі, Батыс, Шығыс әншілік, күйшілік өнері мектептерінің өкілдерін даланың даңғайыр ұлы Алмас жырау Алматов бастап келіпті. 20 жылдық мерейтойына байланысты «Нұр Отан» партиясы ел көлемінде ұйымдастырған өнер жәрмеңкесі бастауын Семейден алып, Павлодар, Шымкентті басып өтіп, Қарағандыға келгені осы екен. Сүйегіне сөз сіңіп, саз дарыған Алмас Алматов жүргізіп отырды кешті. Домбырамен жырдан үзінді сұңқылдатқан соң, кезегін Алатау алабы әндерін нақышына келтіре орындап жүрген Шолпан Әбжановаға ұсынды. Шолпан Кененнің «Игигайы» мен Жамбылдың «Сарыбайға» әнін әуелетті. Алатаудың ән байрағы Арқада желбіреді дегізді. Шыны даусы шекемізді шыңылдатты десе болғандай.

Атақты «Біздің елдің жігіттері» толғауының авторы Жәкен Омаровпен де осы кеште табысты халық. Қолындағы баянымен толғап салғанда, сарын буын-буынды босатып, сай-сүйекке барғандай, жарықтық. Жәкен аға «Ата-ананың қадірі» толғауын тебірене салды. Шапқан аттың арыны мен атқан оқтың жылдамдығы, бәлкім, одан да биік асқақ рухқа көмкерілген Құрманғазы күйлері кештің керемет тартуы болғандай. Оны домбырада төгілдірген – Батыржан Мықтыбаев. Дәулескердің дәулескері екен!

Біржан салдың «Сырғақтысын» орындап шыққан Сержан Мұсайынды халық жібермей төрт ән салғызды. «Қанатталды» мен «Ағаш аяққа» Ақан серінің «Балқадишасын» қосып шырқады. Концерт көрерменнің қалауынша солай өтуі керек қой. Жерлесіміз Дәуренбек Әркеновтен де қолқалап, салуы тиіс екі әніне бір ән қостырып айтқызды ел. Ерлан Рысқали, Гүлмира Сарина сынды әншілерге де сөйтті. «Халық қаласа, хан түйесін соймай ма?». Ешкімнің меселі қайтқан жоқ. Бұдан бөлек, Балқан Смағұлов, Еркежан Сәдуақасова, Ақжан Қали, Әлібек Бимендин, тағы басқа өнерпаздар қобыз, домбырамен ән салып, күй тартты. Бәрін тізе беру мүмкін емес. Екі сағат бойы ел ән құшағында тербеліп, рахатқа батты.

Сағынтай АҚҚОЖИН, көрермен:

«Концерт өте жоғары деңгейде өтті. Нағыз фестиваль осындай болса керек. Көңіл көтеріліп, жақсы демалып қалдық».

Жәнібек ӘЛИМАН.

Сообщение Бұлбұлдар мен дүлдүлдер «беу» дегізіп… появились сначала на «ORTALYQ QAZAQSTAN» газеті.

Фестиваль шымылдығы қала әкімі Асқар Ыдырысовтың жүрекжарды құттықтау лебізімен түрілді.
– Өскелең ұрпақ үшін дәл осындай тәлімі терең, мағынасы ауқымды шаралардың барынша жиірек өткізілуі маңызды. Біз, яғни, ересектер олардың санасында тазалық пен қоршаған ортаға сүйіспеншілік сезімін қалыптастыруға тиіспіз. Табиғат адамзатқа тек төңіректегі әдемілікті ғана тарту етіп қойған жоқ, тереңірек пайымдай білсек, біздің деніміздің саулығы мен тұрмысымыздың жақсарып, әл-ауқатымыздың артуы да соған байланысты. Сондықтан, тұмса табиғаттың баға жетпес сый-сияпатын өз қажетімізге тынымсыз тұтынумен қатар, оны аялай білуді де естен шығармауымыз шарт, – деді қала басшысы.
Өз сөзінде ҚР Парламенті Мәжілісінің депутаты Майра Айсина экологиялық фестивальдің мәні мен маңызын жан-жақты сараптап, оның жоғары деңгейде өткізілуі адамдардың санасын сілкінтіп, табиғатқа жаңашыл әрі жанашыр пейілмен қарауына дәнекерлік етеріне назар аударды. Іргелі іс-шараны ұйымдастыруға талғамшыл талап тұрғысынан келе білген қала әкімдігі мен тиісті мемлекеттік мекемелер басшыларына риясыз алғысын білдірді.
Бүгінгі күннің биігінен қарағанда өте өзекті мәселе саналатын шараға ҚР Инвестициялар
және даму министрлігінің сарапшысы Еңлік Мұқанова, БҰҰ Даму бағдарламасының тұрақты даму жөніндегі департаментінің басшысы Рамазан Жампейісов, БҰҰ Даму бағдарламасының менеджері Сырым Нұрғалиев, БҰҰ Даму бағдарламасының сарапшысы Әділет Тікенов, Әлия Назарбаеваның қоғамдық маңызды бастамаларын дамыту қоры төрағасының орынбасары Татьяна Немцан және аталған қордың департамент директоры Ермек Мәжитов қатысты.
Фестиваль бағдарламасының сан бағыттағы алуан түрлі кешенді шаралардан түзілуі оның тартымдылығын мейлінше арттыра түсті. Мектеп оқушыларының флешмобы, велосипедшілер шеруі, жас атлеттердің сайыс түрлерінен шеберлік машықтарын көрсетуі, мың бұралған бишілердің өнері және басқа да тағылымды жоспар әрекеттері көпшіліктің көзайым қуанышына айналды.
Сонымен қатар, ашық алаңда сурет салу және тоқыма тоқудан өткізілген шеберлік сыныптары талай елді тамсантып, ел қуанышын еселей түсті.
Аталған іс-шараның бастауы биылғы жылдың 30 наурызында Астана қаласынан бастау алған болатын. Біріккен ұлттар ұйымы Даму бағдарламасының қолдауымен қоғамдық маңызы бар бастамаларды дамыту қорының ұйымдастыруымен өтіп жатқан фестиваль алғаш рет Қарағанды облысында Сәтбаев қаласында ғана өткізіліп отыр.
Фестиваль барысында мәртебелі меймандардың қатысуымен қала аумағында 6500 түп ағаш және тал-шыбық көшеттері отырғызылды.
Ықылас танытушылар «Қазақстан» спорттық-сауықтыру кешенінде орналастырылған мектеп оқушыларының инновациялық технология жетістіктеріне арналған көрмесін тамашалау мүмкіндігін иеленді.
Аталған кешен аумағында футболдан жарыс өткізіліп, суға жүзушілер арасында тартысты бәсеке ұйымдастырылды.
Шығармашылық көңіл-күй ауанымен өткізілген фестивальдің қорытындысын шығару рәсімі де шырайлы реңді иеленді. Кешенді шараларға тікелей қатысушылар мен оларды қызыға тамашалаған қала тұрғындары БҰҰ Даму бағдарламасының тұрақты даму жөніндегі департаментінің басшысы Рамазан Жампейісов пен Әлия Назарбаеваның қоғамдық маңызды бастамаларын дамыту қоры төрағасының орынбасары Татьяна Немцан шынайы пейілмен құттықтады. Болмыс-бітімі тым бөлек фестивальдің есте қаларлық сәттері мол болғанын тілге тиек еткен меймандар, өткерілген өнегелі істердің қоғам үшін қайтарымы да өлшеусіз екендігін атап өтті. Қала басшылығына, белсенді қатысушылар мен шаһардың жалпы жұртшылығына ұлағатты ұстанымдары үшін ризашылықтарын бүкпесіз білдірді.
Ұтымды іске ұтқыр әрекеттері арқылы үлес қосқандарға ұйымдастырушы тарап тағайындаған лайықты марапаттарды ҚР Парламенті Мәжілісінің депутаты Майра Айсина мен Сәтбаев қаласының әкімі Асқар Ыдырысов салтанатты жағдайда тапсырды.
Фестиваль түйінінде қалың қауымның назарына «Алқызыл қызғалдақтар қаласы» театрландырылған қойылымы ұсынылып, жарасымды жоба символы – құмсағатты Асқар Абылайұлы Алаш тарихында айтулы орны бар Семей қаласының (Шығыс Қазақстан облысы) өкіліне өткізді.

Ахат ҚҰРМАНСЕЙІТОВ,
«Орталық Қазақстан»

СӘТБАЕВ қаласы.

Сообщение Бағалы бастама – Қаныш қаласында появились сначала на «ORTALYQ QAZAQSTAN» газеті.

Ш.Ділдебаев атындағы Кеншілер сарайының сахнасында өткен фестивальге қала аумағындағы барлық балабақшалар қала мектептерінің төменгі сыныптарынан қатысқан балғын өнерпаздар жас ерекшеліктеріне орай, екі топқа бөлініп өнер көрсетті.

– Іс-шараның басты мақсаты – өнерлі балалардың шығармашылық мүмкіндіктерін ел назарына ұсыну, сол арқылы олардың қарым-қабілеттерін одан әрі ұштай түсу. Бұдан тысқары, әрине, түпкі межеде Тәуелсіздіктің 25 жылдық мерейтойы идеясы төңірегінде өскелең буынды отансүйгіштікке тәрбиелеу ұстанымы да бар. Фестиваль барысында сол межеге белгілі бір деңгейде қол жеткізгеніміз айқындала түсті, – дейді ұйымдастырушы тараптың өкілі, қалалық мәдени-сауық орталығының мәдени іс-шараларды ұйымдастырушысы Гүлдана Тілегенова.

Жас өнерпаздардың арасында ерекше үлгідегі сахналық киімі, ән айту шеберлігі және өзін ұстау мәнерімен дараланып, көрерменнің ыстық ықыласына бөленгендері де көп болды.

Фестиваль қорытындысы бойынша ән орындаушылар, бишілер мен балалар хор ұжымдары тиісті дипломдармен марапатталып, 21 бүлдіршін әншіге арнайы сыйлықтар табыс етілді. Сонымен қатар, өнерге іңкәр балғындарды сахнаға шығуға дайындаған мекемелердің музыкалық жетекшілерінің еңбектері аталып өтіліп, оларға Алғыс хаттар берілді.

Ахат ҚҰРМАНСЕЙІТОВ

СӘТБАЕВ қаласы.

Сообщение Сахнада – балғын өнерпаздар появились сначала на «ORTALYQ QAZAQSTAN» газеті.

Елбасы мен егемендік егіз десек, еңбек жолын алғаш осында бастаған бұл қаланың басқа шаһарлардан бәсі биік. Жасампаздық жолында жаңа Қазақстанның біртұтас бейнесін қалыптастырған Ұлт Көшбасшысының жұлдызын жаққан қала әлемге асқақ қарайды қазір. Аты затына, заты атына сай Теміртау «Қазақстан магниткасы» аталған ірі индустрияның ошағы ғана емес, мәдени бірлестіктердің мәртебелі мекеніне айналған. Жергілікті жеті бірдей этномәдени орталық қатысқан фестиваль соның айғағы болса керек. Қасиетті топырақтың кие-құты өз алдына, Тұңғыш Президенттің табаны тиіп, тері сіңген қазыналы өлке құтаймай қайтсін?!

Теміртау қалалық тарихи-өлкетану мұражайының кең залында шеру тартып, сап түзеген Халықтар достығы қоғамдық бірлестігі өкілдерінің ішінде «Магнитка» атты қазақ ансамблінен бастап, орыс ұлтының «Берегиня», корейлердің «Корияна», татарлардың «Дослук», поляктардың «Полония», немістердің «Фолькшимме» этномәдени орталықтары мен «Туған өлке казактары» одағы бар. Фестиваль барысында әрқайсы топ-топ болып, өз ұлттарының өнерлерін ортаға салып қана қоймай, татулықтың туын көтеріп, жарастықтың жарқын үлгісін көрсетті. Бастысы, бірімен бірі бәсекелесіп, бәйгі алу емес, біртұтас ел бірлігінің бірегей болмысын дәріптеуде және салтанатты шараға қатысушылар сол үдеден шыға білді. Бірігіп ән салды, би билеп, жарастықтың жалауын жоғары көтерді. Олардың өнерін бағалап, қазылық етушілер қатарында Теміртау қаласының ішкі саясат бөлімінің басшысы Динара Жүнісова, Халықтар достығы қоғамдық бірлестігінің төрағасы Ілияс Баймырзаев және Теміртау қалалық тарихи-өлкетану мұражайының директоры Наталья Скорикова бар. «Тура биде туған жоқ» деген атам қазақтың жолымен әділ бағасын беріп, тура төрелігін айтты.

Фестивальді атам қазақтың жолымен «Магнитка» ата-әжелер ансамблі бастады. Мемлекетті құраушы қазақ ұлтының салты бойынша ақ түйенің қарны жарылған атаулы сәтте шашу шашып, дәстүр жаңғыртты апалар. Іле-шала Елбасы Н.Назарбаевтың сөзіне жазылған Алтынбек Қоразбаевтың «Үшқоңыр» әнін шырқады. «Үшқоңыр» – кіндік кескен киелі туған жер, атамекен, сонда кіндігінен байланған елге деген махаббаттан туған ән. Ендеше, әннің өзі елдікті насихаттап тұр десе болғандай. Осы жерде тұрып жатқан елдің бәрін бауырына басқан қазақ елінің кеңқолтық қасиетінің айғағындай ансамбль «Үшқоңырдан» соң, Украин жұртының ұлттық әнін шырқап, елді тәнтті етті. Көрермендер ыстық ықыласын ұштап жатқанда, ортаға орыс ұлтының «Берегиня» этномәдени орталығының өкілдері шықты. Олар да өздерінің ұлттық әндерін шырқап сала берді. Үлкендері бір бөлек, жеткіншек жастары бір бөлек ән салып, көрермендер көзайымына айналды. Ұлттық киім киген бұлардың сән-салтанаты тіптен керемет. Осылай әр орталықтың өкілдері өнерлерін ортаға салып, бірінен-бірі асып түсіп, халықтың қошеметіне бөленді. Ұлттық киім, ұлттық ән-бимен қабысып, татулықтың қазанында қайнап жатты. Біздің елдің көксегені де осы. Фестиваль соңында әрбір ұлт өкілдері әзірлеп әкелген ұлттық тағамдарымен таныстырып, бәрі бір дастарқан басында тоқайласып, жарастықтың жайдары нұрымен шалқыды. Тиісінше, қазылар алқасы да ешбір орталықты ренжітпеді. «Анау озып, мынау қалды» деп алалап бөлмей, бәріне бірдей орын бөліп, марапаттады.

Ілияс Баймырзаев, Халықтар достығы қоғамдық бірлестігінің төрағасы:

– Осы Теміртауда онға тарта этномәдени орталық бар. Соның сегізі жұмыс істеп жатыр бүгінгі таңда. Қандай мереке болса да біз атаусыз қалдырмаймыз. Тәуелсіздіктің 25 жылдығы мен Тұңғыш Президент күні – мемлекетіміздегі басты мерекелер болғандықтан, бүгін осындай фестиваль ұйымдастырып жатқан жайымыз бар. Осының бәрі әуелі Алланың, одан кейін Елбасы мен елдігіміздің, бірлігіміздің арқасы. Бірлік пен татулықтың белгісі – осы жарастық емей немене?!

Жәнібек ӘЛИМАН

ТЕМІРТАУ қаласы.

Сообщение Тұрағымыз – татулық, Тұмарымыз – Тәуелсіздік появились сначала на «ORTALYQ QAZAQSTAN» газеті.

Фестивальге Қарағанды облысының кәсіби С.Сейфуллин атындағы Қарағанды облыстық қазақ драма театры, К.Станиславский атындағы Қарағанды мемлекеттік орыс драма театры, Қарағанды академиялық музыкалық комедия театры, С.Қо­жамқұлов атындағы Жезқазған қазақ музыкалық-драма театры, Теміртау қаласының балалар мен жасөспірімдер театры, сондай-ақ, халықтық және үлгілі көркемөнерпаз театр ұжымдары және облыстық конкурс лауреаттары қатысты.

Фестиваль театр фойесінде бүлдіршіндердің салтанатты шараның ашылуын тамашалауынан басталды. Көрермендер венгриялық драматург Д.Урбанның «Все мыши любят сыр» ертегісі негізінде сұр және ақ тышқандар арасындағы жаулық пен татуласу желісін көріп көзайым болды. Шара барысында ресейлік драматург Г. Махмудовтың «Песочница» (қоюшы-режиссер – О. Попиловская) ертегісінде әлемдегі оқиғаларды қуыршақтар арқылы көрді. Ертегіні «Ровесник» үлгілі балалар драма театры қойды.

Сондай-ақ, С.Цирюктың (автор және қоюшы-режиссер) заманауи қойылымындағы араб ертегісі «Алладин», Е.Пермякованың «Отпен ойнама» (қоюшы-режиссер – А.Қырықбаев) ертегілері сахналанды. Р.Киплингтің «Книга джунглей» желісі бойынша «Маугли» (қоюшы-режиссер – Т.Әб­дірәлім) ертегісін С.Қожамқұлов атындағы Жезқазған қазақ музыкалық-драма театры қойды. Адал жүрек, қызғаныш пен дұшпандық жөніндегі «Молодильные яблоки» орыс халық ертегісін (қоюшы-режиссер – М.Маскалюк) Теміртау қаласының балалар мен жасөспірімдер театры ұсынды.

Шараның жабылу салтанатында қатысушыларға фестивальдің құрылтайшысы Қарағанды облыстық мәдениет, архивтер және құжаттама басқармасының атынан дипломдар табысталды.

Аяулым СОВЕТ

Сообщение Кішкентай көрермендерге арналды появились сначала на «ORTALYQ QAZAQSTAN» газеті.