Құтқарушылар Алматы-Екатеринбург тас жолында ақауы бар автобустан 62 адамды эвакуациялады
Бүгін таңертең Алматы-Екатеринбург тасжолында ақауы бар автобустан жолаушыларды кезекті шұғыл эвакуациялау болды. Құтқарушылар 62 адамды құтқарып, жақын маңдағы ауылға жеткізді. Төтенше жағдайлар департаменті баспасөз қызметінің мәліметінше Худжанд-Новосибирскі бағытында келе жатқан автобуста техникалық ақау орын алып, жолда қалған. Құтқарушылардың жедел жұмысының арқасында олар Ақсу-Аюлы ауылына жеткізілді. Сол жерде дәмханада жылынып, туыстарымен хабарласа алды.
– 31 қаңтарда Алматы-Екатеринбург тас жолының 900-ші шақырымында төтенше жағдайлар қызметінің күштері техникалық ақауы бар «VANHOOL» автобусынан 62 адамды эвакуациялады. Жолаушылардың барлығы Тәжікстан азаматтары. Көлік Худжанд – Новосибирск бағыты бойынша келе жатқан. Зардап шеккендер жоқ. Олар медициналық көмекті қажет етпеді, – деп хабарлады Қарағанды облысының Төтенше жағдайлар департаментінің баспасөз қызметі.
Департамент қоғамдық көліктердің және дизельді қозғалтқышы бар көліктердің иелері мен жүргізушілеріне қауіпсіздік шараларын ерекше назарда ұстау керектігін ескертеді.
Ілияс ДҮНГЕНБАЙҰЛЫ.
