Кеншілер күніне орай Теміртаудағы Qarmet зауытының ғимаратына жаңа мурал тарту етілді. Онда металлургтердің үш буыны бейнеленген. Өткен күннің, қазіргі және болашақтың ажырамас байланысы баяндалған.
Республика 1/3 даңғылы бойындағы мурал эскизінің авторлары – Урбанистика орталығының командасы, ал, орындаушылар – AIR_G командасының суретшілері.
Қарағандыдағы Урбанистика орталығының жобалық менеджері Рүстем Қожабаевтың айтуынша, муралдан металлургтердің үш буынының көрініс табуы бекер емес. Шынында, өнер туындысынан патриотизмнің, тәрбиенің, адал еңбектің үлгісін көруге болады. Сондай-ақ, онда «Болашақ – біздің қолымызда» деген жазу бар.
– Мурал металлургтерге және кенші мамандығына құрметті білдіреді. Кеншілердің жұмысы мен білімі жаңа технология мен прогресті құруға негіз болды. Мурал арқылы аталарымызға деген құрметті көрсеткіміз келді. Ең жас металлург – бала, ертеңге үміт пен сенімді көрсетеді. Баланың жарқын көздері мен алға ұмтылған көзқарасы еңбек пен инновацияның арқасында шындыққа айналатын армандар мен ұмтылыстар туралы айтады, – деп бөлісті Рүстем Қожабаев.
Биыл Урбанистика орталығы Теміртаудағы бірнеше орынды – Qarmet стелаларын және Қарағанды көшесіндегі тұрғын үйді, «Абзал» сауда үйі жанындағы көпқабатты тұрғын үйді және Костенко шахтасының әкімшілік ғимаратын безендірді.
Қазіргі таңда Қарағандыдағы тағы бір мурал «1000 ұсақ-түйек» дүкенінің ғимаратында дайындалып жатыр.
– Тамыз айының соңғы жексенбісінде еліміз бойынша кеншілердің кәсіби мерекесі аталып өтетіні белгілі. Металлургия саласы өте ауыр. Көптеген адамдар жұмыс істейді. Осы салада жұмыс істейтін кеншілерді мақтан тұтамыз.
Бұл мамандық қашанда темірдей төзім мен жауапкершілікті, жанқиярлық пен қайсарлықты талап етеді. Сондықтан да олар қажырлы еңбектері арқылы қоғамда шынайы құрметке бөленіп келеді.
Мурал кеншілер даңқын арттырады. Мереке қарсаңында кеншілерге мықты денсаулық, табыс пен игілік, отбасыларыңызға бақ-береке тілейміз, – дейді Теміртау қаласының тұрғыны Айгүл Амантай.
Аяулым СОВЕТ,
«Ortalyq Qazaqstan»
Сурет облыс әкімдігінің сайтынан
