Күніне – 7 мың бетперде
Облыс кәсіпкерлері негізгі кәсіптері тежеліп тұрса да, қол қусырып отырған жоқ. Мәселен, карантин жағдайына бейімделген Абай тігін фабрикасы алғашқылардың қатарында «Кет, COVID19!», «Деніңіз сау болсын!» және тағы басқа жазулар таңбаланған бетперделер тігуде.
Фабрика тігіншілері өздерінің негізгі тапсырыстарынан бөлек, күніне 6 мыңнан 7 мыңға дейін бетперде дайындайды. Сұранысқа ие тауар жууға және үтіктеуге ыңғайлы болуы үшін 100% табиғи мата – дәке, шыт немесе бөзден тігіледі. Аталмыш фабриканың негізгі жұмысы да жүріп тұр. Олар төсекорын жабдығын, күнделікті және арнайы киімдер тігуді жалғастыруда. Ал, карантин кезінде мамандар сырт киімдердің түрлі үлгілерін, аңшылар мен балықшылар киімдерінің, мектеп формасының жаңа үлгілерін әзірлеп, шағын партиясын дайындап та үлгерген.
– Жаңа модель ойлап табу үшін қазір уақыт жеткілікті. Соны пайдаланып, бұған дейін түскен тапсырыстарды да орындау мүмкіндігі бар, – дейді фабрика басшысы, Кәсіпкерлер палатасы өңірлік кеңесінің мүшесі Ирина Малюк.
Салтанат ІЛИЯШ.
