Өңір басшылары бас қосты
«ЭКСПО – 2017» Халықаралық көрмесін ұйымдастыру кеңсесінде Астана, Алматы қалалары мен облыс әкімдері бас қосты. «Астана ЭКСПО – 2017» ҰК» АҚ Басқарма Төрағасы Ахметжан ЕСІМОВТІҢ қатысуымен өткен кеңесте Көрмені өткізу, ұйымдастыру мәселелері талқыланды.
Облыс және қала басшылары көрме нысандарымен, павильондардың контентімен, билеттік бағдарлама және оның шарттарымен, сондай-ақ, іскерлік және мәдени-сауық бағдарламасымен де танысты.
Ахметжан Есімов кеңес қатысушыларына «ЭКСПО – 2017» Елбасының жобасы екендігін еске салды. Сондай-ақ, жергілікті билік өкілдерінің халыққа «ЭКСПО – 2017» идеясын және оның ел экономикасына тигізер оң ықпалын түсіндірудің маңыздылығын жеткізді.
– Өткен аптада Президенттің төрағалығымен кеңес өтті. Мемлекет басшысы Көрменің дайындық дәрежесін жоғары бағалады. «ЭКСПО – 2017» көрмесінің ашылуына бір жарым ай уақыт қалды. Сондықтан, шараның жоғары деңгейде өтуі үшін жұмыла жұмыс істеуіміз қажет,– деді А.Есімов.
Қазір барлық қатысушы елдер өздерінің павильондарын жабдықтаумен айналысуда. Көрмені өңірлер мен шетелдерде белсенді таныстыру жүргізіліп жатыр. Осыған орай, Ұлттық компания жетекшісі, бірегей шараны аймақтарда насихаттау керектігін атап өтті.
Қуаныш АМАНҚҰЛОВ
