І облыстық «Қасым оқулары» байқауы өтті

«Сарыарқа дарыны» балаларға қосымша білім беру аймақтық ғылыми-практикалық орталығының ұйымдастыруымен оқушылардың шығармашылық қабілеттерін, эстетикалық талғамдарын, табиғи дарындарын анықтау, поэзияға деген құштарлығын арттыру мақсатында І облыстық «Қасым оқулары» байқауы өтті.

Облыс деңгейінде бірінші мәрте өтіп отырған байқауға аймағымыздың түкпір- түкпірінен 8-11 сынып оқушылары арасында 50 үміткер қатысты. Байқау жеңімпаздары арнайы диплом мен ақшалай сыйлықтармен (100 000 – 50 000 теңге аралығында) марапатталды.

Байқау 3 бағыт бойынша өтті. Әр номинация бойынша белгілі ғалымдар мен өнер майталмандарынан, ақындардан құралған қазылар алқасы төрелік етті. «Өзіммен бірге өлмесін, өлеңім деп…» ақын өлеңдерін мәнерлеп жатқа оқу бағытында І орынды Қарағанды қаласы «№61 ЖББМ» оқушысы Алина Наурызбай иеленсе, ІІ орынды Ақтоғай ауданы «Ж.Ақбай атындағы мектеп оқушысы Кәусар Марат пен Саран қаласы №7 мектеп- интернатының оқушысы Ақнұр Кувандикова өзара бөлісті.

ІІІ орынмен Абай ауданы «А. Байтұрсынов атындағы мектеп- гимназиясының» оқушысы Зарина Айбекова, Шет ауданы «Ы.Алтынсарин атындағы ТМ» оқушысы Ислам Көпбаев, Қарағанды қаласы «Мұрагер» ММЛИ оқушысы Алуа Сағынбаева марапатталды.

«Өзге емес, өзім айтам өз жайымды…» атты дауылпаз ақынның әндерін орындау бағытында І орынды Қарағанды қаласы «Б.Момышұлы атындағы ЖББМ » оқушысы Арман Мейрамбай қанжығасына байлады.

ІІ орынды Саран қаласы №7 мектеп- интернатының оқушысы Алтынбек Зайтхан мен Қарқаралы ауданы Талды ауылының №19 ЖББ тірек мектебінің (ресурстық орталық) оқушысы Инабат Төлеуғали жеңіп алды. Жүлделі ІІІ орынға Абай ауданы «А. Құнанбаев атындағы №5 мектеп- гимназия» оқушысы Жаннұр Санай, Бұқар жырау ауданы «А.Байтұрсынұлы атындағы ЖББМ» оқушысы Аңсар Әбдірахман, Қарағанды қаласы «Дарын» ММЛИ оқушысы Қанағат Караманова ие болды.

«Берейін өмірімнен өлең жасап…» бағыты яғни жас ақындар мүшайрасында Қарағанды қаласы «№61 ЖББМ » оқушысы Изат Нұрғасыр қатарластарынан қара үзіп шығып, І орынға лайық деп танылды.

Жүлделі ІІ орынды Қарағанды қаласы Жамбыл атындағы мамандандырылған мектеп-лицей- интернатының оқушысы Наурызбай Игілік, Теміртау қаласы «№4 ЖББМ» оқушысы Шұғыла Үсен өзара бөлісті.

ІІІ орынмен Шахтинск қаласы «Әлихан Бөкейхан атындағы мектеп- лицейінің» оқушысы Нұртілек Хайратұлы, Осакаров ауданы «Қ.Сәтпаев атындағы тірек мектебінің (ресурстық орталығы)» оқушысы Айжан Болат, Қарқаралы ауданы «Көктас ауылының №4 ЖББ тірек мектебінің» оқушысы Аяжан Дауылбай марапатталды.

Аталмыш байқау келесі жылы республикалық деңгейде ұйымдастырылады деп жоспарлануда.

Ілияс ДҮНГЕНБАЙҰЛЫ.