Балқашта спорт фестивалі басталды
Балқаш қаласында салауатты өмір салтын ұстанатын үш мыңға жуық спортшылардың басын қосқан фестиваль басталды. Спорт мерекесі осы айдың соңына дейін жалғасады деп жоспарлануда.
Аталмыш фестиваль ардагерлер арасындағы ашық волейбол турнирінен басталды. Балқаш қаласы мен Ақтоғай және Шет аудандарынан 6 команда қатысқан турнирде бірінші орын балқаштық «Жібек жолы» командасының қанжығасына байланды. Жүлделі екінші орынға «Қазақмыс» корпорациясының спортшылары ие болса, Ақтоғай ауданының әуесқой волейболшылары үздік үштікті қорытындылады.
– Балқашта осындай көлемдегі фестиваль алғаш рет ұйымдастырылып отыр. Біз ерлер мен әйелдер арасында волейбол мен баскетболдан ашық турнирлер мен қала әкімінің кубогына арналған шағын футбол лигасын, еркін күрес пен бокстан жасөспірімдер арасында республикалық турнирлер өткізбекпіз. Аталмыш фестиваль қала көшелерінде өтетін жеңілатлетикалық жарыстар мен “Металлург” стадионында қазақ күресінен үздік балуандар бақ сынайтын жалпықалалық мерекемен аяқталмақ. Барлық спорттық жарыстар мен сайыстарда біз үш мыңға жуық тұрғынды қамтуды жоспарлап отырмыз, – дейді мәдениет, тілдерді дамыту, дене шынықтыру және спорт бөлімі басшысының міндетін атқарушы Ізбасар Шәкенов.
Спорт фестивалі аясында Балқаштың орталық алаңында киіз үйлер тігіліп, қазақстандық эстрада жұлдыздарының концерті өтпек.
Ілияс ДҮНГЕНБАЙҰЛЫ,
ortalyq.kz
