Қазақтың даңқты қызы
Шілде айының соңында Қазақстанның халық артисі, Мемлекеттік сыйлықтың лауреаты, «Парасат» орденінің, сондай-ақ, шетелдік бірнеше жоғарғы наградалардың иегері, әйгілі пианист жерлесіміз Жәния Яхияқызы Әубәкірова Шет ауданына келді.
Музыкант әуелі Ақшоқы ауылдық округіндегі ата-бабасының зиратына соғып, құран бағыштады. Аталарының ежелгі қонысына барып, Әубәкір бұлағының басында тігілген киіз үйден дәм татты.
Туған жерге тағзым ете келген қонақты аудандық Мәдениет үйінің алдында аудан басшылығы, ардагер ақсақалдар, барша ауыл тұрғындары тік тұрып, құрметпен қарсы алды. Шашу шашылып, арнау айтылды.
Салтанатты кездесуге ҚР Парламенті Мәжілісінің депутаты Нұрлан Дулатбеков, Құрметті металлург, Теміртау қаласы және Шет ауданының Құрметті азаматы Қуаныш Омашев, белгілі қоғам қайраткері Қабылсаят Әбішев, қазақ журналистикасының еңбек сіңірген қайраткері Сәулебек Жәмкенов, ауыл шаруашылығы саласының көрнекті қызметкері, жерлесіміз Санат Тұңғышбеков және тағы да басқа Астана, Қарағанды, Жезқазған қалаларынан келген өнер, ғылым иелері мен Жәнияның туғантуыстары қатысты.
Құрметпен сахна төріне шақырылған Жәния Яхияқызын аудан әкімі Марат Жандәулетов, аудандық мәслихат хатшысы Бәкен Төлеуқұлов құттықтап, «Шет ауданының Құрметті азаматы» атағын табыс етті. Сыйсыяпаттар жасады
Өнер жұлдызы көпшілікке жүрекжарды сөзін арнап, аудан жұртшылығы мен ел азаматтарына шексіз ризашылығын білдірді.
Жәнияның пианинода сүйемелдеуімен Қазақстанның еңбек сіңірген артисі Амантай Ибраев бірнеше ария орындады. Жәнияның өзі қазақ әндерінен попурри орындап, көпшіліктің ыстық ықыласына бөленді.
Ауданның мәдени-сауық орталығының өнерпаздары да ән мен жырдан шашу шашып, мерекенің шырайын енгізді.
Салтанатты кеште қазақтың даңқты қызына арнаған лебіздерін онымен бірге келген жоғары мәртебелі қонақтар, ауыл ақсақалы Боранбай Жұмкин, туысқандары – Құрманғазы Әміров, Алтыбай Ибраев білдірді. Туыстарының демеуімен қазақы дәстүрмен сый-сыяпат жасалып, тойханада дастархан жайылды.
Ертай ЖӘНІБЕКОВ,
Шет ауданы әкімінің баспасөз хатшысы.
