Қарағандыда мектеп оқушылары көршілерін өрттен аман алып қалды

Қарағандыдағы Сортировка тұрғын алабында шыққан өрттен мектеп оқушылары қарт көршілерін аман алып қалды, – деп хабарлайды ortalyq.kz Tengrinews.kz сайтына сілтеме жасап.

15 жастағы Ерасыл мен 14 жастағы Қанат көмек сұрап айғайлаған қарт көршілерді өрттен аман алып қалған.

Олардың бұл батырлығы әлеуметтік желілерде тарады. Алғыстарын білдірген жергілікті тұрғындар балалардың суреттерін жариялап, олардың көмегімен адам шығыны болмағанын атап өтті.

Tengrinews.kz тілшісі ағайындылардың бірімен хабарласты.

Ол үйде ата мен әже тұрады. Ағам екеуміз оларға қар тазалауға көмектестік. Кенет үйден өрт болып жатыр деп айғайлады. Қарлы күректерді алып, үйге жүгірдік, – дейді Ерасыл.

Ерасылдың айтуынша, кейінірек басқа көрші бала келген. Жігіттер өртті қармен сөндірген. Кейін Ерасыл өрт сөндірушілерді шақырып үлгерген.

Өрт орташа болды. Өрт сөндірушілер 15 минутта келді. Біз жартысын сөндірдік. Өрт сөндірушілер төбені және қабырғаларды өздері сөндірді, – деп түсіндірді бала.

Ерасыл 8 сынып оқушысы, ағасы Қанат Сортировкадағы №12 мектептің 9 сыныбында оқиды.