Аймақта 13 мыңға жуық түлек ҰБТ тапсырады

Қазақстанда ҰБТ-ның негізгі кезеңі 18 мамыр мен 5 шілде аралығы деп белгіленген. Осы арада аймақта 13 мыңға жуық мектеп пен колледж түлектері тестілеуден өтеді деп жаспарлануда.

ҚР Ғылым және жоғары білім министрлігінің шешімімен биыл мектеп түлектері ҰБТ-ны екі мәрте тапсырады. Екі ҰБТ нәтижесі бойынша ең жоғарғы балл есепке алынып, оқушылардың ЖОО-ға грантқа түсу мүмкіндігі артты. Бұл норма заңмен бекітілген. Екінші ҰБТ кезінде бейінді пәндердің комбинацияларын өзгертуге рұқсат етілмейді. Мысалы, қаңтарда тапсырған ҰБТ-да «Информатика мұғалімдерін даярлау», «Ақпараттық технологиялар», «Ақпараттық қауіпсіздік» білім беру бағдарламаларының топтарына түсуге ниет білдірушілер бұл жолы «Математика-информатика» комбинациясы бойынша тапсырады.

– Биыл ҰБТ-ға 13 мыңға жуық адам тіркелді. Бұл қатарда грантқа үміткер оқушылар мен колледж түлектері, өткен жылдардағы мектеп түлектері, қандастар, шетелдік мектеп түлектері бар. Тіркелу кезінде тестіленушілер емтиханды өткізу орнын, күнін және уақытын өздері таңдады. Тестілеу форматында өзгерістер жоқ. Пәндердің саны өзгеріссіз қалды – үшеуі міндетті және екеуі таңдау бойынша. Жалпы 120 тест тапсырмасы бар. Ең көп ұпай саны – 140, – дейді Ұлттық тестілеу орталығының Қарағанды филиалының басшысы Динара Баймағанбетова.

«Қазақстан тарихы» және «Оқу сауаттылығы» пәндері бойынша тест тапсырмаларының саны ғана өзгерді. Енді «Қазақстан тарихының» бір нұсқасында 20 тест тапсырмасы бар: бір дұрыс жауапты таңдаумен 10 тапсырма, контекст негізінде 10 тапсырма. Сондай-ақ, егер бұрын «Оқу сауаттылығы» бойынша тестіленушілер 20 сұраққа жауап берсе, қазір үш мәтін бойынша 15 тапсырма беріледі.

Сонымен қатар, жауап беру нұсқалары азайды. Бір дұрыс жауап беретін тест тапсырмаларында нұсқалар саны бес-төртке дейін азаяды, бір немесе бірнеше дұрыс жауаптары бар тест тапсырмаларында (үш дұрыс жауаптан аспайды) нұсқалар саны сегізден алтыға дейін азаяды.

– Тестілеудің жалпы уақыты әлі төрт сағатты құрайды (240 минут). Сондай-ақ, ерекше білім беру қажеттіліктері бар балалар үшін қосымша уақыт (40 минут) сақталды. Мүгедектігі бар адамдар ҰБТ-да тапсырылатын пәндердің мұғалім болып табылмайтын көмекшіні ұсыну қажеттігін көрсете алады, – деп атап өтті Динара Баймағанбетова.

Тестілеу кезінде калькулятор, периодтық кестелер және тұздардың ерігіштігі компьютер экрандарында болады. Түлектердің қалауы бойынша кестелердің қағаз нұсқалары ұсынылады. ҰБТ-ны аяқтағаннан кейін тестіленушінің жеке кабинетінде жеке тақырыптық талдау қол жетімді, бұл оларға білімді меңгеру деңгейін түсінуге мүмкіндік береді.

Оқу жылы – 31 мамырда аяқталады. Биыл аймақ бойынша 172 мыңнан астам түлек үлкен өмірге қадам басады. Оның ішінде 7260-ы – 11-сынып, 15 мыңнан астамы – 9-сынып оқушылары. Сонымен қатар, аймақта 147 түлек – «Алтын белгіге», 412 түлек – «Үздік аттестатқа» үміткер.

Аида РАХЫМҚҰЛОВА,
Ortalyq.kz