Құрылыстың мұраты – қолжетімді ем
Балқашта жүрекке шұғыл көмек қажет болған науқас бірқатар емшараны енді Қарағандыға бармай-ақ ала алады. Бұқар жырау ауданындағы Гагарино ауылының тұрғыны үшін жаңа амбулаторияның пайдасы – қажетті тексеруден ауылдың өзінде өтіп, бейінді маманнан қашықтан кеңес алу мүмкіндігі. Бірі – ауданаралық аурухана, екіншісі – ауылдағы алғашқы көмек орны. Екеуінің де игілігі емге жетер жолды қысқартуынан көрінеді. Жаңа Конституцияның 32-бабы азаматтардың денсаулығын сақтау және заңда белгіленген медициналық көмекті ақы төлемей алу құқығын бекітеді. Осы кепілдік тұрғысынан қарасақ, жаңа аурухананың құны оған жұмсалған қаржымен бірге, науқасқа ұттырмаған уақытымен де өлшенеді.

Балқаш қаласындағы көпбейінді ауруханада жаңа қабылдау бөлімшесі мен екі операциялық залы бар корпус ашылып, ангиографиялық орталық іске қосылды. Құрылысқа мемлекетке қайтарылған активтер есебінен 1 млрд теңге бөлінген. Диагностикалық жабдық республикалық бюджет қаражатына сатып алынған. Облыс әкімдігінің баспасөз қызметінің мәліметінше, орталықта шілдеден бері 148 ангиографиялық зерттеу мен эндоваскулярлық емшара жүргізілген. Оның 70-і – қан тамырының тарылған тұсын кеңейтуге арналған стенттеу мен баллондық ангиопластика.
Орталық Балқаш пен Приозерск қалаларының, Шет және Ақтоғай аудандарының шамамен 150 мың тұрғынына мамандандырылған көмекті жақындатты. Жүрек-қан тамыры сырқаты асқынған кезде жолға кететін уақыттың өзі қымбат.
Қарағандыдағы облыстық кардиологиялық орталықта жылына үш мыңға дейін жүрек-қан тамырлары операциясы жасалады. Рентген-операциялық блок бейімделген үй-жайда орналасқандықтан, жаңа блок салып, қосымша үш ангиограф сатып алу және төсек қорын 200 орынға дейін ұлғайту жоспарланған. Қызмет көлемінен кеңейтудің негізі көрінеді. Ендігі өлшем – жаңа блок іске қосылғанда науқастың тексеру мен отаға кезегі қаншалықты қысқаратыны.
Онкологиялық диспансердің жаңа операциялық және реанимациялық блогында жеті операциялық бөлме мен 15 жансақтау төсегі қарастырылған. Жобалық есеп бойынша, мұнда жылына жеті мыңға дейін күрделі ота жасауға мүмкіндік туады. Бұл қуаттың қаншасы нақты іске қосылатыны хирургтер мен анестезиологтардың жеткіліктілігіне, операциядан кейінгі күтімнің ұйымдастырылуына байланысты.
Конституцияның 30-бабында ана, әке мен бала мемлекет қорғауында екені бекітілген. Осы қағида тұрғысынан Қарағандыда 2029 жылы аяқтау жоспарланған 200 төсектік перинаталдық орталыққа назар аударуға болады. Онда жүктілік патологиясы, жаңа туған нәрестелер хирургиясы және жансақтау бөлімдері қарастырылған. Ұлттық статистика бюросының дерегінше, биылғы сегіз айда облыста 8 372 сәби дүниеге келген. Бұл былтырғы сәйкес кезеңнен 8,8 пайызға аз. Орталыққа деген қажеттілікті бағалау үшін жалпы туу санымен бірге күрделі босану жағдайларын, шала туған нәрестелерге мамандандырылған көмек көлемін және қазіргі перзентханалардың жүктемесін зерделеген жөн.
Ауылдық денсаулық сақтауды жаңғырту аясында облыста 92 медициналық нысан пайдалануға берілді. Гагарино ауылындағы амбулатория 1 500-ден астам тұрғынға қызмет көрсетеді. Мұнда диагностикалық тексеру, телемедицина және оңалту қызметтері қарастырылған. Ауылдағы алғашқы көмектің мүмкіндігі кеңейген сайын тұрғын тексерілу немесе кеңес алу үшін аудан орталығына сирек қатынайды. Ал, күрделі көмек қажет болса, оны қай мекемеде және қанша уақытта алатыны да алдын ала ойластырылуға тиіс.
Облыстың денсаулық сақтау басқармасының мәліметінше, мемлекеттік медициналық ұйымдарда 144 штат бірлігі бос, оның 95-і – дәрігер орны. Жалпы практика дәрігерлері, акушер-гинекологтар, педиатрлар мен анестезиолог-реаниматологтар жетіспейді. Сондықтан, құрылыс жоспарымен бірге жаңа бөлімшенің маманын қайдан тартатынын, оны өңірде қалай тұрақтандыратынын да шешу қажет. Әйтпесе, заманауи жабдық орнатылғанымен, науқастың күту мерзімі сол күйінде қалуы мүмкін.
Мағжан ҚҰДАЙБЕРГЕН
«Ortalyq Qazaqstan»



