Жоба жеңімпаздарына – миллион теңге
Аймақта «Zhas project» жобасының жеңімпаздары анықталды. Конкурсқа барлығы 196 өтінім түскен. Соның ішінен әлеуметтік маңызды деген 14 жоба авторы шағын грант иегері атанып, 1 миллион теңге көлеміндегі сертификатқа ие болды.
Конкурсқа қатысуға наурыз-сәуір айларында өтінім қабылдау жүргізілген болатын, енді қорытындысы шықты. Ұйымдастырушылардың айтуынша, жоба жастарды нәтижелі жұмыспен қамтуға көмектеседі.
Жеңімпаздардың бірі Теміртау қаласының тұрғыны Ольга Бородулина өз мамандығы бойынша жұмысын жалғастыратынын айтады.
– Менің жобам ерекше білім беру қажеттілігі бар балаларды оқыту, дамытуға бағытталған. Мамандығым – дефектолог. Балалардың әлеуметтенуіне көңіл бөлемін. Грант қаражатына кабинетімді жаңа техникамен жабдықтап, әдістемелік материалдарды жаңартамын. Бұл менің қызметімді сапалырақ етеді деп ойлаймын. Бүгінде тұрақты келетін 10-15 бала бар, – дейді ол.
«Zhas Project» жергілікті аймақтың әлеуметтік мәселелерін шешуге, кәсіпкерлік идеялары мен бастамаларына жәрдемдесуге бағытталған. Оның ішінде, әлеуметтік осал, NEET санатындағы жастарды қолдауға басымдық береді.
Қолдау тапқан жобалар арасында фаст-фуд, барбершоп, ротоботехника үйірмесін ашу, дұрыс тамақтану өнімдерін өндіру сияқты жобалар бар.
Биыл «Zhas Project» еліміздің барлық өңірінде құзырлы министрлік және «Азаматтық бастамаларды қолдау орталығы» үкіметтік емес ұйымы тапсырысымен жүзеге асырылуда. Жоба аясында 2024 жылы барлығы 280 шағын грант беру жоспарланған.
Жансая ОМАРБЕК,
Ortalyq.kz
