Жезқазған музейіне құнды жәдігерлер табысталды
Жезқазған тұрғындары қаланың тарихи-археологиялық музейіне 300-ге жуық экспонат тапсырды, деп хабарлайды ҚазАқпарат тілшісі.
«Жаңа көкжиектегі музей» республикалық фестивалі аясында Жезқазған тарихи-археологиялық музейінің қызметкерлері 2018 жылдың қантар-сәуір айларында «Өз есіміңді тарихта қалдыр» акциясын өткізді. Оның мақсаты – мұражай қорын сирек кездесетін және бірегей экспонаттармен толықтыру», – деді музей басшысының орынбасары Зағира Қалменова.
Мысалға, Мемлекеттік қызмет саласындағы өңірлік хабтың басқарушы комитетінің төрағасы Әлихан Бәйменов музей қорына құнды жәдігер – ХІХ ғасырдағы «Шахнаме» басылымын тапсырды.
Сондай-ақ Жезқазған тұрғындары мен қонақтары бұдан былай қолдан тігілген алашаны, ағаштан жасалған көне ыдысты, саптама етікті, ХХ ғасырдың ортасындағы баспа машинкасын, тұңғыш ғарышкер-әйел В.Терешковаға тапсырылған «Ғарышты игеруге 50 жыл» белгісін көре алады.
Мұражай қоры сонымен қатар саяси қуғын-сүргінге ұшырағандар азаматтардың бас бостандығынан айыру мекемелерінде туған-туысқандарына жазған хаттарымен толықты.
